En 1929 aprobouse un ambicioso proxecto para a dotación de residencias de estudantes e doutras necesidades da Universidade, que foi a base do actual Campus Sur. Este proxecto supuxo unha ampliación -e tamén unha alternativa- á conxestionada cidade existente, seguindo as ideas hixienistas decimonónicas de 'cidade verde', 'cidade xardín'.

O trazado xeral baséase nun eixo que mira a poñente desde a escalinata que o conecta coa Alameda, e que relaciona zonas verdes, equipamentos deportivos e residencias. Desde a cima da grande escaleira gózase dunhas magníficas vistas do conxunto, así coma do monte Pedroso e do val da Amaía. A auga que brota ao pé da escaleira percorre o paseo central dando lugar a estanques e fontes.

Os  xardíns formalízanse cun rigoroso trazado xeométrico: prados, terrados, estanques e camiños enlázanse mediante paseos nos que podemos atopar unha gran diversidade de árbores e plantas ornamentais -tuias, camelias, magnolios, piñeiros, cedros, cimbros, ginkgos...-, constituíndo un peculiar xardín botánico urbano.


Ficha técnica:

Extensión: 400.000 m² 
Duración percorrido: 10 minutos
Topografía: pendente mínima
Horario: 24 horas
Especial interese botánico
Especial interese monumental
Vistas / miradoiro
Amplas zonas de sombra
Amplas zonas de céspede
Áreas de descanso con bancos
Posibilidade de percorrelo en bicicleta
Accesibilidade para minusválidos
Fontes de auga potable
Cursos de auga: estanque
Zonas deportivas
Iluminación nocturna
Proximidade de zonas de aparcamento