Consellaría de Medio Ambiente

Arquitectos: Alfredo Freixedo Alemparte.
Data: 1999-2002.
Zona: coroa exterior.

Este edificio administrativo, sede da Consellaría de Medio Ambiente, é o resultado dun concurso arquitectónico cuxo primeiro premio recaeu na proposta do arquitecto Alfredo Freixedo. Concibido como un prisma rotundo, este edificio recolle a tradición ortodoxa do Movemento Moderno para construír un espazo de traballo eficaz e neutro. Un corpo prismático alongado, cos núcleos de comunicación e servizos nos extremos, dispón, en cada unha das súas tres plantas, de dúas bandas, abertas ás fachadas maiores e a un patio alongado central con vocación de claustro. En cada una destas áreas de traballo é posíbel modificar as súas compartimentacións para adaptalas ás múltiples esixencias de uso ás que está suxeito un edificio destas características. A cuberta plana, as fiestras corridas e a austeridade formal completan esta adscrición á modernidade.

A pel do edificio, tanto nas súas fachadas exteriores como nas interiores, é de aceiro corten, material frecuentemente utilizado por Freixedo. A inconfundíbel textura e a cor do metal oxidado dotan ao edificio dunha presenza singular, que transforma a súa aparencia neutra e abstracta nun dos fitos visuais máis destacados do último tramo do percorrido do Camiño Francés, a cuxo bordo se sitúa.

Mais información

Localización

Rúa San Lázaro

Observacións

Visitas: en horario de oficina ( de 8.00 a 15.00 h, coas limitacións propias do seu uso administrativo).

Enviar información por SMS

Se detecta algún erro nesta páxina, por favor comuníqueo a ot@santiagoturismo.com

Google Street View é un servizo automático de Google que obtén imaxes a pé de rúa en base a súa localización xeográfica. Turismo de Santiago non é responsable do seu contido, encadre ou punto de vista. A inclusión deste recurso é só a título informativo.