CGAC (Centro Galego de Arte Contemporánea)

Creado en 1993 e con programación estable desde 1995, o Centro Galego de Arte Contemporánea está, no límite da cidade monumental, nun espacio máxico para os galegos, compartindo veciñanza co convento de San Domingos de Bonaval, onde se encontra o Panteón de Galegos Ilustres; co Museo do Pobo Galego, lembranza etnográfica da nosa historia, ademais de constante ponte e metáfora entre as nosas orixes e a actualidade; e cun antigo cemiterio, recuperado por Álvaro Siza (coa colaboración de Isabel Aguirre) e convertido en sorprendente xardín de aires metafísicos, unha presencia moi galaica da auga e unha solución en explanadas e volumes que dá suxestiva réplica ós do centro.

O primeiro activo do CGAC é a súa arquitectura, deseñada polo portugués Álvaro Siza, nunha coidada conxunción de respecto exterior cara ó contorno e un sentido case místico no seu interior, de intensos contrastes entre limpos planos e os efectos dunha luz sempre indirecta. Os espacios creados, tan arquitectonicamente belos como difíciles cando se trata de procurar solucións expositivas, provocan que se estableza un constante diálogo (cómplice ou tenso) entre artistas e arquitecto. Un diálogo moi propio da arte contemporánea, as solucións do cal benefician sempre ó espectador, que asiste á resolución final do encontro e intúe os puntos e momentos de auténtica tensión creativa.

O CGAC plantea as súas actividades tanto en amosar as liñas directrices da arte das últimas décadas mediante retrospectivas de artistas que contan cun recoñecemento internacional xeralizado e forman parte da historia destes anos (o arquitecto Álvaro Siza, Giovanni Anselmo, Christian Boltanski, Felix Gonzalez-Torres, Vito Acconci, Ana Mendieta, Arnulf Rainer, Dan Graham, Giuseppe Penone, Jürgen Partenheimer, Robert Mangold, Helena Almeida, Rebecca Horn, Georges Rousse, Stephan Balkenhol, Alberto Carneiro, Antony Gormley, Richard Tuttle, Mona Hatoum), como en revisar a obra de artistas ou momentos anteriores de xiro estético (Medardo Rosso, Giuseppe Terragni, Marcel Broodthaers, Kurt Schwitters, Luis Buñuel, O cambio de século na pintura parisina...) Tampouco se esquecen, loxicamente, colectivas de tese (Itínere, Signos y milagros, Imágenes y visiones, Outra mirada, Minimal Maximal, Lost in Sound, De Warhol a Cabrita Reis, Transfer, Mondophrenetic, Garaje, Oito relatos nórdicos) ou revisións críticas dos nomes que marcaron os momentos máis intensos da arte galega deste século (Maruja Mallo, Laxeiro, Leopoldo Nóvoa, Alberto Datas, Carlos Alcolea, Rafael Baixeras, Luís Seoane, Francisco Leiro, Jorge Castillo).

Dun notorio dinamismo son as intervencións e os proxectos específicos, preparados pensando nas especiais condicións do CGAC por artistas máis novos, tanto galegos (Isaac Pérez Vicente, Antón Patiño, Antón Lamazares, Ánxel Huete, Jorge Barbi, Berta Cáccamo, Santiago Mayo, Vari Caramés, Pamen Pereira, Salvador Cidrás, Mónica Alonso, Xoán Anleo, Antonio Murado, Manuel Vilariño) como foráneos (Juan Muñoz, Perejaume, Nacho Criado, Anish Kapoor, Adolfo Schlosser, Hans Hemmert, Frank Thiel, Johan Grimonprez, Chema Madoz, Humberto Rivas, James Casebere, Tracey Moffatt, Elisa Sighicelli, Loris Cecchini, José Antonio Hernández-Diez, Florence Paradeis, Sarah Dobai, Darío Villalba, Peter Wüthrich, Efrain Almeida, Gillian Wearing, Ernesto Neto, Marine Hugonnier, Juan Navarro Baldeweg, Josiah McElheny).
Os ciclos de conferencias, os talleres impartidos por artistas, os debates públicos entre artistas e críticos, a programación dunha plataforma de vídeo, as consultas das nosas actividades a través de Internet (www. cgac. org), as incursións no campo da música, a danza, a literatura, o teatro ou o cinema conforman o día a día inescusable dun centro que quere ser ante todo un espacio activo.

Unha coidada liña editorial, encamiñada tanto á producción de catálogos e unha revista sobre as actividades do centro, como á preparación de material didáctico e folletos.

Galería de imaxes

Mais información

Localización

Rúa de Ramón del Valle-Inclán, 5, Santiago de Compostela, 15703

Teléfono

981 546 619

E-mail

cgac@xunta.es

Fax

981 546 625

Prezo

libre.

Horario

Horario de verán: de 12:00 a 21:00 h. Horario de inverno: de 11:00 a 20:00 h. Luns pechado

Tempada

Todo o ano.

Web

http://www.cgac.org

Enviar información por SMS

Se detecta algún erro nesta páxina, por favor comuníqueo a ot@santiagoturismo.com

Google Street View é un servizo automático de Google que obtén imaxes a pé de rúa en base a súa localización xeográfica. Turismo de Santiago non é responsable do seu contido, encadre ou punto de vista. A inclusión deste recurso é só a título informativo.