Santiago contará no 2011 con 150 empresas adheridas ao Sistema de Calidade Turística en Destino

A Mesa da Calidade Turística, encargada da xestión local do Sistema Integral de Calidade Turística en Destino (SICTED), aprobou hoxe a distinción das 150 empresas do sector que superaron as avaliacións correspondentes para poder obter este selo de calidade, que está avalado pola Secretaría Xeral de Turismo do Ministerio de Industria, Turismo e Comercio, e a Federación Española de Municipios e Provincias.

Na reunión, Turismo de Santiago explicou as accións que levou a cabo durante este ano para implantar este recoñecemento de calidade no sector turístico da cidade. No 2004, primeiro ano de funcionamento do SICTED en Santiago houbo 37 empresas adheridas, e neste son xa 150, sinal do compromiso crecente do sector coa calidade.

Por subsectores, distinguíronse: 29 hoteis, 2 museos e centros de interese turístico, o Santiago de Compostela Convention Bureau, a Santiago de Compostela Film Commission, a Oficina de Información turística de Turismo de Santiago, 7 casas de Turismo rural, 25 guías turísticos, 4 Organizadores profesionais de congresos, 2 bares, 4 axencias de viaxes, 56 comercios, 15 restaurantes, o Tren turístico, un servizo turístico de saúde e outro baixo a categoría de outros servizos.

Na reunión tamén se explicaron as novidades que se introducen no SICTED encamiñadas a mellorar a calidade de empresas e servizos, como o novo deseño que terán os distintivos que poderán lucir as empresas adheridas, a nova plataforma de xestión do sistema que fará máis sinxelos os trámites para as empresas, a nova política de avaliación das empresas, ou o novo programa formativo para as empresas.