2. Viños e tapas

Chegaremos á praza das Praterías, e alcanzaremos a entrada da rúa da Raíña, en cuxos baixos abundan bares, decenas de vellas tascas e restaurantes, que conviven con modernos locais, onde se coce a saborosa tradición galega. En moitos aínda se bebe o viño da casa en cuncas e se serven xenerosas tapas. Nas fachadas, alternando cos farois, amontóanse as cartelas de ferro fundido con motivos decorativos: vieiras, cruces de Santiago ou alusións gráficas ao nome do estabelecemento, algúns centenarios. 

Nos arredores da Praza da Quintana visitaremos varios bares e restaurantes da Rúa da Conga. 

No noso percorrido por estes locais probaremos viños das cinco denominacións de orixe de Galicia. Nesta terra prodúcense algúns dos mellores brancos do mundo, sen dúbida, pero tamén comezan despuntar espléndidos tintos. Galicia é curiosamente a única zona produtora de España na que aos viños se lles chama polo nome da uva que se emprega máis que polo da propia denominación de orixe que a ampara: un ‘albariño’ é en realidade un viño de etiqueta Rías Baixas, que se contan entre os mellores brancos do mundo. Sucede tamén coa uva godello, cuxos viños (D. O. Valdeorras) comezan destacar en concursos e catas. E o mesmo pasa entre os tintos: adóitase pedir un ‘mencía’, uva empregada nos caldos da D.O. Ribeira Sacra, nados hai 20 séculos para satisfacer os padais dos césares romanos. Sálvanse desta tendencia de alcumes as outras denominacións, ambas as dúas ourensás: Ribeiro, que ofrece tanto viños brancos como tintos, e Monterrei, viños de baixa acidez.  

Galería de imaxes

2. Viños e tapas