"En Galicia, comer é sempre un pracer."

Para todos os gustos

En Santiago hai unha magnífica representación da restauración galega, nos seus diversos formatos: dende selectos restaurantes, entrañabeis casas de comidas ou pousadas, pulperías e tentadoras marisquerías, a locais 'in' onde crean tendencia os chefs da nova cociña galega. Mais tamén características grellarías e churrasquerías, herdanza da emigración masiva dos galegos á Arxentina, ou concorridas xamonerías, viñotecas e tabernas de toda a vida, nas que serven tapas -pequenos bocados, ás veces suculentos, que na maioría dos lugares serven gratis coa bebida-, racións -típicas do país e normalmente pensadas para ser compartidas entre varios-, pinchos -unidosis das anteriores- e táboas de embutidos, queixos ou patés.

Como non podía ser doutro xeito, na cidade teñen unha grande presencia todas as cociñas rexionais –vasca, castelá, mediterránea, etc.- que forman a grande familia da gastronomía española, alén de estar presentes a cociña vexetariana e vegana e as principais tradicións culinarias do mundo: italiana, grega, xaponesa, china, palestiniana, marroquina, turca, brasileira e outras.

Que Santiago sexa unha cidade universitaria garantiza ademais unha oferta de menús do día a baixo prezo, nun sinnúmero de establecementos espallados por toda a cidade.

A oferta complétase con tres mercados gastronómicos. Por unha banda, a Nave 5, situada dentro do Mercado de Abastos, conta con varios locais de restauración con propostas tanto para consumir alí como para levar ao exterior. Por outra, La Galiciana ocupa unha nave de 1.200 metros cadrados nos que degustar pratos tradicionais e vangardistas da cociña galega, do mesmo xeito ca internacionais. Todo compartindo unhas longas mesas ao máis puro estilo das romarías populares de Galicia. Por último, o Mercado Boanerges xunta nun mesmo espazo catorce postos especializados nun produto: polbo, peixe, mariscos, conservas, algas, carnes, ovos, queixo, pan exeados. Na primeira planta dispón dun restaurante de cociña tradicional actualizada e unha coctelaría de autor.

Buscador de Restaurantes

Mejicana

El Cártel de Mawey

Pico de Galo

Valentina Taquería