Compostela goza dun singular privilexio concedido por vez primeira cara 1122 polo Papa Calisto II. Tense coñecemento del grazas a outra bula de 1179, esta si conservada: a Regis aeterni do Papa Alexandre III, que confirma o privilexio outorgado á Catedral polo Papa Calisto II (1118-1124). Dous irmáns seus, Raimundo e Henrique de Borgoña, tomaran por esposas ás fillas do rei Afonso VI, Urraca e Teresa, herdeiras dos territorios de Galicia e Portugal; fortaleceran así os xa sólidos vínculos entre a sé compostelá e o Papado, o que se manifesta claramente no impulso que imprimiron Calisto II e o rei Afonso VI ás peregrinacións xacobeas.

O privilexio consiste en que cada ano en que o 25 de xullo, festa do Apóstolo Santiago, coincide en domingo, poderanse ganar na Igrexa de Compostela as grazas do Xubileu.

Debido a esta condición, os Anos Santos prodúcense con aparente irregularidade, separados por intervalos de seis, cinco, seis e once anos. Os últimos do século XX foron 1993 e 1999. Este 2021 será o Ano Santo número 120 na historia, contando a partires de 1182. Os seguintes serán en 2027 e 2032.

A Igrexa, co Ano Xubilar, institúe un tempo especial de graza, durante o cal é posíbel obter unha indulxencia plenaria para o perdón da pena que merecen os pecados cometidos. As condicións para gañar o Xubileu son:

1) Visitar a Catedral de Santiago onde se garda a Tumba de Santiago o Maior.

2) Rezar algunha oración (polo menos, o Credo, o Nosopai e pedir polas intencións do Papa) recoméndase asistir á Santa Misa.

3) Recibir os sacramentos da penitencia (pode ser 15 días antes ou despois) e da Comuñón .

Galería de imaxes

Cando é Ano Santo?