|
A Concellaría de Promoción Económica,
Emprego, Comercio e Turismo convida un ano máis a todos os veciños
e veciñas de Santiago a redescubrir a súa cidade a través
da renovación da campaña Vivir
Compostela, que no ano 2007 permitiu a 3.400 cidadáns,
entre particulares e grupos, achegarse a Santiago coa ollada dos que
nos visitan.
Vivir Compostela é
un programa de sensibilización co turismo que convida ás
xentes de Santiago a participar deste fenómeno, tan importante
para a economía e a vida cotiá da nosa cidade. Durante
un mes a poboación de Santiago poderá gozar de balde dos
mellores recursos da cidade. Se ainda che queda espazo na cámara
de fotos, é o momento de aproveitalo.
Este ano Vivir Compostela
incorpora novas actividades, moitas na fin de semana, que permiten descubrir
recunchos sorprendentes que se agochan en Compostela. Podemos coñecer
a ribeira do Sarela ou o patrimonio natural da Universidade, ver traballar
nos seus obradoiros a artesáns e creadores composteláns,
percorrer a Cidade da Cultura ou mirar Compostela dende as cubertas
da Catedral.
Podemos achegarnos á historia das Peregrinacións no seu
museo, somerxernos na exposición Galicia Dixital, chegar ate
a fin do mundo na excursión a Fisterra e moito máis. Visitas
guiadas e excursións deseñadas para os turistas, pero
grazas ás que os composteláns e as compostelás
poden coñecer mellor a súa cidade.
Este mes de outubro a Concellaría convoca de novo a todos os
veciños e veciñas a Vivir
Compostela e gozar da súa cidade.
 |
 |
|
