O proxecto MUSEO MIGRANTE MIGRANTE · EN MOVEMENTO (MMM), da fotógrafa e artista Angélica Dass, chega a Santiago de Compostela do 14 ao 19 de abril con actividades na Zona C e no Auditorio de Galicia. MMM é un “arquivo vivo de obxectos, memorias e traxectorias en movemento” que propón construír un museo en constante transformación a partir das historias das persoas e das súas migracións.

Durante a súa estadía, a versión en Movemento do proxecto convida á cidadanía a participar en sesións fotográficas na Zona C, onde as persoas achegarán obxectos e testemuños que serán parte dun arquivo visual e dixital compartido. A iniciativa entende a migración como unha condición esencial da humanidade e converte a fotografía nunha ferramenta de escoita, memoria e representación colectiva. Paralelamente, desenvolveranse actividades complementarias que amplían a dimensión pedagóxica e social do proxecto.

O xoves 16 de abril, entre as 17:00 e as 19:00 h, terá lugar unha charla aberta na Sala Mozart do Auditorio de Galicia, na que a artista presentará o seu traballo internacional, incluíndo proxectos como Humanae e MMM, acompañada por profesionais galegas que traballan arredor das experiencias migratorias. A participación nas sesións fotográficas require inscrición previa.

O vindeiro sábado 18 de abril, Área Central Outlet convértese no escenario de “Circo en clave de vento”, unha proposta cultural sorprendente que fusiona o circo contemporáneo coa música en directo. Con motivo do Día Mundial do Circo, o CMUS Profesional de Santiago e Circonove unen forzas para ofrecer un espectáculo cheo de ritmo, emoción e creatividade, pensado para todos os públicos.

O alumnado do consort de dobre lingüeta será o encargado de poñer banda sonora en vivo, con instrumentos como o oboe ou o fagot, creando unha atmosfera única para acompañar números de acrobacias, equilibrio, expresión corporal e teatro físico. Un diálogo constante entre son e movemento que transforma cada actuación nunha experiencia artística completa.

Un plan perfecto para gozar en familia ou con amizades, nun espazo accesible e pensado para todos os públicos.
Entrada gratuíta.

Death Cafe ou Café da Morte é unha xuntanza de persoas para dialogar e reflexionar arredor de cuestións relacionadas coa morte. As persoas participantes, que a miúdo non se coñecen entre si, reúnense para tomar café ou té e conversar sobre un final inevitablemente transversal. O obxectivo destas convocatorias é favorecer un diálogo aberto que axude a aumentar a conciencia sobre a morte e a poñer luz sobre un tema tradicionalmente tabú, coa finalidade de apoiarse mutuamente para vivir de maneira máis plena a vida finita que compartimos como seres humanos.

Os Death Cafe son iniciativas sen ánimo de lucro e organízanse en espazos accesibles pero íntimos. Non son grupos de dó nin sesións terapéuticas, senón encontros abertos e respectuosos, independentemente das crenzas ou condicións persoais. Non hai persoas expertas que dirixan o contido, senón facilitadoras e facilitadores que velan por que o diálogo flúa libremente dentro do marco da temática.

ESDLB Ao vivo propón unha experiencia que vai máis aló do formato podcast, combinando humor e reflexión nun encontro directo co público. Ricardo Moya sobe ao escenario acompañado de convidados sorpresa para abordar, con honestidade e intelixencia, temas que conectan coas emocións e a realidade contemporánea. Unha proposta que convida a rir, pensar e descubrir novas perspectivas a través de historias que inspiran e interpelan.