Adaptada por Henrique Harguidey e dirixida por Celso Parada, a obra de R. Mohamed conta unha historia situada nunha América imaxinaria, preto da fronteira, entre un cemiterio e unha gasolineira, nun bar sen idade, refuxio para almas solitarias. Un vello negro, un vendedor de polo fritido, unha camareira coa cara medio paralizada ou un arqueólogo en busca de vestixios dos indios son algúns dos seus estraños protagonistas.

Estrea da nova montaxe da compañía teatral Eme2, que ao longo de cinco xornadas ofrecerá no Salón Teatro a representación de 'O florido pénsil', as vicisitudes dun grupo de rapaces sometidos á absurda e ilóxica brutalidade do sistema educativo que dominou a España da posguerra. Protagonizada polos populares actores galegos Xosé Manuel Oliveira “Pico” e Antonio Durán “Morris”.

Autoría: Andrés Sopeña
Dirección: Fernando Bernués, Mireia Gabilondo
Elenco: Xosé Manuel Oliveira “Pico”, Antonio Durán “Morris”, Federico Pérez, Josito Porto, Alfonso Agra
Xénero: Teatro adultos/Comedia

As vicisitudes dun grupo de rapaces sometidos á absurda e ilóxica brutalidade do sistema educativo que dominou a España da posguerra. Os seus protagonistas descóbrennos un fresco no que se sucederán os escenarios da acción; en primeiro lugar a escola –centro de operacións fundamental para a propaganda do ideario fascista– e, máis tarde, o resto das tribunas desde onde o réxime mandaba os seus sinais de apoio: o cinema de barrio, a radio familiar, a igrexa e a prensa, representada aquí polo aparentemente inofensivo Tebeo.

+ info: www.emedous.com

A última produción da compañía Lagarta Lagarta leva a escena a obra de Antonio Tabares, unha peza que nos introduce nunha hora moi especial do matrimonio Zweig e que nos mantén en vilo sobre o que en realidade sucedeu na vida do grande escritor, ou o que puido suceder. Dirixida por Rosa Álvarez, conta co protagonismo de Ernesto Chao, Belén Constenla e César Cambeiro.

'Oiseau Rebelle (paxaro rebelde)' é un espectáculo de teatro-danza, verbal, plástico e sonoro que dialoga sobre o imaxinario amoroso e des-amoroso. Un ritual do corazón como músculo, como metáfora e como alimento.

Que impide ás novas xeracións caer no amor? Para caer temos que ter unha certa seguridade de podernos levantar, ou aínda máis, un ten que poder sentirse a si mesmo e aceptarse tendo a necesidade de ser visto polo outro. Pode que falte isto nas novas xeracións, na nosa: a capacidade de sentirnos a nós mesmos. Mesmo despois de facelo é difícil namorarse ou comezar unha historia "sincera".

'Oiseau Rebelle (paxaro rebelde)' é un espectáculo sobre o amor. Non ese amor que traspasa todas as fronteiras, senón o amor de hoxe, o da nosa xeración. O amor que sentimos nós, Cristina e Paulina, e o que cremos que proxectan as persoas que nos rodean. O noso xeito de sentir está condicionado polos códigos culturais cos que nos criamos: o cine, a literatura, os estereotipos publicitarios e os prexuizos sexuais que imos adquirindo en torno á montaña de información que recibimos da sociedade. Aprendéronnos a amar? Esta e a cuestión da que parte o proxecto.

Partindo das nosas historias reais queremos indagar sobre o amor sen corpo ou amor cibernético, a moderación do amor e a dicotomía entre namorarse e permanecer en parella.