Durante o mes de novembro, e coincidindo coa visita do Papa a Santiago, a Igrexa da Universidade acolle a mostra 'Sucesores de Pedro en Galicia', un percorrido cronolóxico polas visitas dos Pontífices Dámaso I, Juan XXIII, Juan Pablo II e Benedicto XVI a Galicia e Compostela.

O descubrimento da tumba do Apóstolo Santiago polo bispo Teodomiro, a principios do século IX, inicia unha serie de acontecementos que, baixo a protección do papado, dan lugar ao culto xacobeo e sitúan a Compostela como centro de peregrinación para a cristiandade.

Ao longo dos séculos foron numerosos os pontífices que dunha ou outra forma ofreceron o auspicio necesario para a consolidación deste feito, e dous os sucesores de Pedro que no século XX visitaron a cidade para render culto ao Apóstolo Santiago.

Agora, e con motivo da chegada do Papa Benedicto XVI a Santiago de Compostela como peregrino da fe, a exposición "Sucesores de Pedro en Galicia" identifica os pontífices máis vinculados a Compostela. A mostra está protagonizada por unha selección de imaxes do fotógrafo Manolo Blanco, quen retratou maxistralmente as visitas apostólicas a Santiago de Juan Pablo II en 1982 e 1989, buscando mostrar a natureza do culto xacobeo, vixente dende o século IX ata os nosos días.

Manolo Blanco desenvolveu a súa carreira profesional como redactor xefe de fotografía do xornal El Correo Gallego. Entre os premios e mencións recibidas ao longo da súa carreira destacan o Premio Galicia de Periodismo, Premio Galicia de Comunicación e Premio Fotoxornalismo Fundación Caixa Galicia; así mesmo foi finalista dos premios nacionais Foto Press.

Artistas de diferentes países unirán as súas voces pola paz e a concordia nun concerto titulado "O espírito da música", que se celebrará esta tarde no Teatro Principal. Será un concerto de góspel moderno e contemporáneo baixo a supervisión de Marco Brusati, responsable da organización de varios eventos masivos e director xeral de Hope Music School en Italia.

Aforo:400 persoas

Os artistas invitados son:

Black Soul Gospel Choir (Sardeña, Italia):
Este grupo, dirixido por Francisco Mocci, leva máis dunha década actuando nos máis destacados eventos xuvenís celebrados en torno á figura do Papa, en especial de Benedicto XVI. Os seus compoñentes, formados na Hope Music School de Italia, ofreceron ao longo da historia do coro máis de 200 concertos.

Lois Kirby (Reino Unido):
Empezou a tocar o piano de nena, antes de ir á escola, nun ámbito familiar onde se compoñían cancións de góspel arredor deste instrumento. De feito, a familia Kirby protagonizou numerosas funcións que lle deron fama en Londres e en todo o Reino Unido. Lois estudou piano, canto clásico e canto jazz. Entre as formacións nas que participou están o Coro Xuvenil Nacional, New Vision, Power House, The Visual Ministries ou London Community Gospel Choir. Tamén colaborou con artistas do talle de Take 6, The Wade, Gladys Knight, Jeffry Osborne e Chaka Khan.

Sentinel Crew (Francia):
Son a evolución moderna do góspel clásico, dotándoo dos ritmos do hip hop en versión ragga. O grupo o fornan Sibbecaï e K-Remel, dous mozos saídos dos suburbios que están a ser unha revolución no campo da música cristiá e que coas súas letras, rimas e ritmos chegan á xuventude dun xeito diferente e próximo.

Esta tarde, e con motivo da visita do papa Benedicto XVI, o Colexio La Salle acolle o concerto gratuíto para os máis novos ofrecido por Migueli e Gaby Soñer, dous cantautores cristiáns.

Aforamento: 750 persoas

O compositor estremeño Migueli, moinante e todoterreo, é moi coñecido no circuíto de cantautores de Madrid. A súa faceta como músico compaxínaa cun loable labor social cos desfavorecidos e marxinados. Este profesor conviviu con xente recén saída do cárcere, imparte cursos de carácter social, participa en charlas, seminarios, congresos, talleres... por toda España e Latinoamérica. Ademais, é membro do equipo do popular programa de radio "La Jungla" con Abellán en Cadena 100, onde ten a súa sección "Cositas Buenas" para facerlle un oco a grupos que están a empezar. Tamén escribe sobre música na revista "21 RS", en Relixión Dixital e colabora no programa "Fronteras" de Radio Nacional de España. Recibiu os Culturas 2009 da Xunta de Extremadura e Alandar.

Gaby Soñer únese tamén á programación cultural para celebrar a visita do Papa a Santiago de Compostela. Tras dez anos de rock n' roll, estrada e excesos de todo tipo, Gaby Soñer puxo fin á súa colaboración coa banda Capitán Flynn. Pero aquela non foi a súa despedida dos escenarios. A lectura do soneto "No me mueve, mi Dios, para quererte", atribuído a Santa Teresa de Ávila, reconduciría o camiño musical e persoal de Gaby. Foi o detonante para que se reformulase o sentido da súa vida e de todo aquilo que o rodeaba.

E así foi como encontrou os Irmáns Capuchinos, que espertaron o seu interese en Jesús de Nazaret primeiro, e por Francisco de Asís, despois. Gaby Soñer comezou entón un camiño catecumenal, coa lectura de libros, convivencias, encontros, retiros... A súa fe íase consolidando e os valores franciscanos empezaron a formar parte da súa vida. E sentía que tiña que facer algo polos máis desfavorecidos. Por iso empezou a colaborar con Cáritas. Pero aínda faltaba algo máis. Un día colleu a súa guitarra e cantoulle a Francisco de Asís, decatándose de que podía poñer música ao que estaba a sentir e vivindo. E volveu compoñer. Dunha canción xurdiu outra, e doutra, un repertorio; do repertorio, un disco e do primeiro disco, varios mais -cinco para ser exactos- froito dese camiño de transición de roqueiro a xograr de deus.

Con motivo da celebración do Xacobeo, o Papa Benedicto XVI visita hoxe a cidade de Compostela acompañado polo secretario de Estado do Vaticano, o cardeal Tarcisio Bertone, o substituto da Secretaría de Estado, monseñor Fernando Filoni e o prefecto de Cerimonias Pontificias, monseñor Guido Marini. Trátase da primeira vez na historia da Igrexa que nun Ano Santo, expresamente, o Papa acode a Santiago. A anterior visita dun Papa á cidade tivo lugar en 1982 con Juan Pablo II, pero foi con motivo da visita pastoral que ese ano realizou en España.

A programación da súa visita, anunciada polo arcebispo Julián Barrio, constará de tres actos principais. O primeiro deles será tras a súa chegada ao aeroporto de Lavacolla, a media mañá, onde será recibido oficialmente por membros da Casa Real e autoridades eclesiásticas e civís, nacionais, autonómicas e locais.

Tras desprazarse en papamóbil ata a cidade, entrará na catedral pola porta de Azabachería, como "peregrino da fe e testemuña de Cristo Resucitado". Terá oportunidade de rezar na capela da Comuñón, contemplar o Pórtico da Gloria, rezar ante a tumba do Apóstolo Santiago, pasar pola Porta Santa, abrazar o Apóstolo, dirixir unhas palabras aos asistentes e gozar do Botafumeiro. Os asistentes a este acto que se desenvolverá no interior da basílica compostelá serán enfermos, nenos e anciáns.

Tras comer e descansar no Pazo Arcebispal, Benedicto XVI presidirá a Eucaristía na praza do Obradoiro. A última hora da tarde dirixirase a Lavacolla e alí, despedido por un reducido número de autoridades, desprazarase a Barcelona.