A banda pontevedresa Delahoja ofrece esta noite un concerto no que interpretará os temas do seu último traballo, ‘Nuestra B.S.O.’. Estará acompañada polo grupo Tramaturgia.

Arranca Microfest, un dos festivais de música rap e hip hop máis lonxevos de toda a península. Neste primeiro concerto poderemos escoitar aos mallorquinos La Puta Opepé e ao madrileño Darmo. Como representante da escena galega intervirá o compostelán Erin, de Comando Katana.

Nach, o MC alacantino que presenta o seu novo disco, ‘Mejor que el silencio’, encabeza o cartel da novena edición do Microfest, un dos eventos de hip hop máis lonxevos de toda a península. Completan a velada os vigueses Kaixo Sama VS Elecesar.

A Sala Moon acolle esta noite a presentación oficial do primeiro disco de Kotto, rapeiro compostelán que tras anos en varios grupos da capital galega como Mito Escrito ou 504, se lanza en solitario con 'Arte descatalogado'. No seu debut, Kotto estará acompañado de coñecidos DJs e rapeiros como Kultama, Ambito Kinitoh, Burton Fink ou DJ Cro.

Alamedadosoulna, unha banda con moitas táboas sobre os escenarios, que practica unha gran mestura de ska e reggae, chega esta noite á Sala Capitol para ofrecer un espectáculo cheo de humor.

DJ Mill e Pablic é unha formación compostelá que mestura o hip hop con diferentes estilos como reggae, funky…nunha aposta de calidade rompedora e sorprendente.

Un ano máis a Mostra de creación emerxente Feito A Man chega a Compostela e terá lugar entre o 6 e o 25 de agosto en espazos singulares da cidade. Feito A Man promóvese como unha iniciativa asociada á intensa actividade desenvolvida pola Asociación Cultural Cidade Vella, integrada por establecementos emblemáticos do casco histórico compostelán. A Asociación e os establecementos que lle dan vida, crean o festival no ano 2003 como un espazo natural de encontro, interdependencia, reflexión, formación e intercambio entre músicos, espectadores, artistas, creadores e a propia cidade, que cobra vida en comunidade, en diferentes espazos e con diferentes miradas, amables e fusionadas. Nas nove edicións anteriores, cerca de 30.000 espectadores participaron da completa programación que o festival deseña desde os seus inicios. Neste tempo, Feito A Man consolidouse como un festival de referencia e cita ineludible para os amantes da cultura libre, comprometida, urbana e de calidade.
Co convencemento de que a implicación social é a vía máis idónea para a dinamización activa da cidade, a décima edición de Feito A Man ve a luz grazas á organización e soporte dos establecementos: Momo... A Rúa, Mercromina, Fraggle Rock, Ultramarinos, Casa Das Crechas, Borriquita De Belém, Modus Vivendi, Embora, Babel, A Reixa, Atlántico, Metate e Literarios.

Erin, de Santiago de Compostela, é unha das novas promesas do rap, ragga, dancehall underground no norte de España. Integrante de Comando Katana e Selassie Sound System, leva editados un traballo curto e un disco gravado en Savia Records "DESDE ANTES HASTA AHORA". Agora preséntanos o seu último traballo "EL TRAPICISTA EP" producido por COOKIN SOUL e JEFE DE LA M entre outros artistas e gravado por HAZHE en FIBONACCIMUSIK (Granada).

H-Kayne é unha pregunta en árabe, "Que pasa?", e unhas das mellores bandas de hip hop actuais. Co máis puro son groovy e influencias orientais, scratches contundentes, as súas letras están ás antípodas do gangsta-rap e, como Amal, nos falan de esperanza. Este ano, o Festival daralles voz para inaugurar xuntos noso décimo aniversario.

XA SE PODEN RECOLLER AS ENTRADAS GRATUITAS NA FUNDACIÓN ARAGUANEY-PUENTE DE CULTURAS.

C/ Montero Ríos, 25-27. Santiago de Compostela

O hip hop, o jazz e outros xéneros danse a man nunha proposta capitaneada por un dos músicos máis inquedos do jazz nacional. Ayza presentará en Santiago os temas do seu último traballo, Live At Home (Fresh Sound New Talent) coa presenza en exclusiva do reputado MC neoiorquino BluRum 13.

O baterista e compositor Marc Ayza (Barcelona, 1976) é un dos músicos máis relevantes e heterodoxos da actual escena do jazz barcelonés. Cun discurso incisivo, audaz e vigoroso, Ayza mestura sen ambaxes a enerxía do hip hop coa estética do jazz nunha sorte de pucheiro no que conflúen, en perfecta harmonía, sons que evocan tanto a cultura do turntablism dos 90 como a do jazz vindicativo dos 60, no que se amalgaman todo tipo de rexistros procedentes de diferentes tradicións musicais. Non en van, o Marc Ayza Group une un trío base de piano, contrabaixo e batería a un disc-jokey e un MC. A súa é unha viaxe onírica, cadenciosa, que cativou públicos heteroxéneos.

Marc Ayza foi discípulo de mestres do talle de Jorge Rossy, Quim Solé ou Peer Wyboris. Debutou en 2004 co álbum Deejah (Satchmo, 2004) e en 2008, tras unha longa estanza en Nova York, publicou o CD Offering (Fresh Sound New Talent), saudado pola crítica e a afección. En 2011 gravou no histórico club Jamboree de Barcelona o disco en directo Live At Home (FSNT, 2011), traballo que presentou, entre outros eventos, no prestixioso Festival de Jazz de Londres. Ao longo da súa prolífica carreira, Marc Ayza tocou con reputados jazzman nacionais e internacionais: Perico Sambeat, Víctor de Diego, Raynald Colom, Antonio Hart, Mulgrew Miller, Steve Kuhn, Sheila Jordan e Seamus Blake, entre outros.

Á marxe dos seus compañeiros habituais -Roger Mas, ao piano, Tom Warburton, ao contrabaixo, e DJ Helios, nos pratos- cabe destacar a presenza por primeira vez no Marc Ayza Group do estadounidense MC BluRum 13, con quen o baterista comparte o proxecto Beat'a'Boom. Natural de Nova York, BluRum 13 cultiva un singular estilo, a medio camiño entre o flow e a declamación poética, que o levou a ser unha das voces máis notables da escena europea e norteamericana do hip hop. Fundador en Maryland do colectivo Water Power, traballou con DJ e produtores da categoría de DJ Vadim, Luke Vibert, Kid Koala, Ben Mono e Grandtheft. BluRum 13 compartiu cartel con estrelas como Herbie Hancock, Maceo Parker, The Fugees ou Slum Village. En 2010 participou no proxecto Beat'a'Boom de Marc Ayza, co que viaxou por toda España.

O pub Cachán Clube acolle esta noite a segunda cita musical do Subsolo Rap festival, no que participarán Furnier, Rebelióm do Inframundo, J.ODT e o DJ Mil.

Despois dos concertos, o festival continúa na Taberna O Pozo (Ruela das Ánimas) coa sesión do selector Sick Boy González.

A sala Moon acolle esta noite unha dobre cita musical co rap de Alto Asalto e o rock de Recambios Tucho.

The Psycho Realm, grupo de rap underground de Los Ángeles formado por Cynic, Sick Jacken e DJ FM, actúa esta noite na Sala Moon. No escenario tamén estarán Racketerno e DJ MIL.

A banda pontevedresa de hip hop Delahoja ofrece esta noite un concerto no que interpretará os temas do seu último traballo, 'Más difícil todavía'. Estará acompañada polo grupo Olímpicos.

'Inferno' é sen dúbida o álbum máis maduro ata a data do dúo madrileño e o máis traballado a niveis de sons, estruturas e letras. As rimas ácidas e Hardcore deste grupo condúcennos durante 14 temas entre ritmos de rap clásico e moderno mesturados con rock, reggae, dubstep e electrónica.

O coñecido colectivo de hip-hop Dios Ke Te Crew, fundado en Ordes no ano 2003, cumpre dez anos de traxectoria. A presentación do X Aniversario terá lugar o día 25 de maio na Sala Capitol. Para dita ocasión, Dios Ke Te Crew ofrecerá un espectáculo especial onde, ademais de numerosas sorpresas, agasallarán a tódolos asistentes cun CD de edición non venal con dúas cancións inéditas.