O Museo do Pobo Galego celebra unha nova edición de 'Contos e Historias de Orixe Popular'. Esta, que é xa a cuarta, está dedicada ás e aos portadores é dicir, ás fontes principais da narración oral, posuidores dun saber tan noso como universal. Son algúns dos e das veciñas da parroquia de Zobra (Lalín) acompañados por Celso Fernández Sanmartín, as persoas que van representar a quen desde un traballo comprometido contribúen a xeración de espazos onde continuar recuperando e recreando a nosa tradición oral.

Interveñen: Hortensia, Amparo, Celso, Preciosa, Celsa, Samuel, Lolita... da parroquia de Zobra
Coordinación: Carme Campo e Ana Estévez

"Cheguei de fóra, presentéimelle a Hortensia que foi a primeira persona que atopei en Zobra,
estaba na horta sachando, eu viñera en bicicleta desde Lalín un día de moita calor, ía en
pantalón curto, inda hoxe Hortensia, que segue traballando no tear, me recorda que levaba
aquel primeiro día uns pantalóns rabeliños, e fun atendido nas miñas preguntas, e fun
indagado nas súas, e fun aceptado. E despois apareceu Amparo que co fillo e a nora e as netas
cura o mel á vista do monte Coco, e a Amelia que inda ata hai pouco tiña a súa nai, eran elas
dúas na casa, e a Samuel con Francia e o lobo e as ovellas e que coida de súa irmá Preciosa, e a
Rosa que lle trouxeron polas cimas da Serra do Candán desde Portugal un anel de ouro de
parte de seu irmau, e a Celsa do Acebedo co seu home e o acordeón, e a Elisa que lle subín polo
balcón á casa e me dou a merenda, e a Lolita que sabe os romances, e a quen me contou un día
que saíndo da taberna de Osita unha forza o colleu, levantouno e levouno polo aire desde alí ó
lugar da Cerdeiriña e o pousou na cima dunha cerdeira e non daba baixado dela… Cheguei sen
presa e sempre fun ben recibido, sempre regresei con alegría. Cando marcho contar fóra teño
antes que ilas ver, entrar nas cociñas, escoitalas, agradecerlles, contar o contar delas".
Celso Fernández Sanmartín

Baixo o título de 'Memoria de Compostela' o Consorcio de Santiago ideou unha mostra na que se invita ao visitante a realizar un singular percorrido pola historia de Santiago a partir de vellas fotografías e dos primeiros rótulos que conformaron o rueiro da cidade e que son propiedade do Concello.

A orixe destes rótulos históricos está nas primeiras ordenanzas municipais encamiñadas a establecer unha rotulación das rúas en 1837. A rotulación non se fai efectiva até 1866 cando se comezan a colocar nas paredes dos edificios as placas con letras negras sobre fondo branco cunha dimensión de ao redor de 40x30 centímetros. Tamén se procedeu á numeración das vivendas, moitas das cales aínda conservan os rótulos orixinais. Estas placas luciron no rueiro santiagués até 1964 cando, baixo a coordinación do arquitecto Francisco Pons Sorolla, substituíronse por unhas novas placas graníticas cos nomes tallados a bisel, reproducindo un abecedario de tipo romano pintado en vermello sangue. Este deseño é o que segue vixente na actualidade.

Xunto ás placas, a exposición recolle varias fotografías antigas, de finais do século XIX e de comezos do XX, que permiten botar a vista atrás e descubrir novas estampas, algunhas inmutables, da cidade de Santiago de Compostela. A mostra quere ser un recoñecemento ao labor que durante décadas realizou José Luís Cabo Villaverde na recuperación de material gráfico inédito, que veu enriquecer o patrimonio histórico-cultural de Compostela e que compilou no seu libro Compostela. Memoria fotográfica, publicada con Pablo Costa e editado por Ara Solis en 1996.

De forma complementaria, a mostra expón unha serie de reproducións de planos antigos da cidade. Son planos que se gardan nos arquivos municipais e da catedral e no Instituto de Estudos Galegos Padre Sarmiento. Destacan un plano procedentes do Arquivo Xeral de Simancas, no que se debuxa a antiga muralla, e dúas vistas de Santiago, de Pier Maria Baldi (1669) e Ramón Gil Rey (1837).

Ata mediados do mes de outubro, e con motivo da celebración da XVII edición do Festival Internacional de Títeres Galicreques, a sede da SGAE en Santiago acolle unha exposición titulada 'Teatriños de papel', que amosa ao visitante a colección de teatriños de Carmen Domech.

Nesta exposición recóllese unha ampla mostra de teatriños de papel en tres dimensións que recrean algunhas das máis famosas obras da literatura universal. Poderás atopar Aladino e a lámpada marabillosa, Alicia no país das marabillas, Alí Babá e os 40 ladróns, Carapuchiña Vermella… con personaxes, vestiario, decorados e outros elementos de atrezzo.

Máis info sobre Galicreques 2012 aquí

A exposición fotográfica 'Compostela única' é unha iniciativa do Obradoiro de fotografía do Ateneo de Santiago coa que se pretende rescatar para os veciños imaxes da súa cidade, das súas xentes e do seu urbanismo, anteriores ao ano 1965. Ademais de homenaxear a quen souberon conservar esa parte da historia, grazas a esta mostra poderemos achegarnos aos profundos cambios que se produciron en Compostela na segunda metade do século XX.

A referencia a 1965 tómase porque se considera o primeiro Ano Santo «moderno» e un punto de inflexión na vida e desenvolvemento socioeconómico e urbano de Santiago.

O grupo musical Café Quijano chega ao Teatro Principal para presentar o seu novo traballo, 'Orígenes: el bolero', un disco co que o trío regresa á escena artística tras oito anos de separación.

"Estes "Orígenes" son iso, a orixe máis pura e real; nunca máis exacto un título para describir o noso traballo.
Iso, en canto a concepto, intención, desexo e necesidade.
Amor, desamor, impotencia, desexo, insatisfacción, anhelo, frenesí, desánimo e frustración en canto a contido lírico.
Sentimento exacerbado que abrangue o concepto e o contido. Iso é "Orígenes".
A miña realidade e unha imaxinación elástica, adestrada, romántica, realista e extremista sentimentalmente lévanme a describir nestas doce cancións o vivido e o imaxinado.
O vaivén de emocións é constante no escrito e máis, se cabe, unha vez cantado.
Non podo evitar impregnarme das sensacións destas letras aínda que non sexan meus todos os sentimentos.
Sen querer, síntoos; por reais, uns, e por posibles, outros.
Volver era unha necesidade; foron oito anos botándonos de menos. Botando de menos seguir gozando xuntos a viaxe da nosa vida, a nosa experiencia vital: a música.
E, o bolero, outra necesidade. Con el crecemos, fixémonos músicos.
Sempre imaxinamos facer un disco íntegro de boleros. Este é o disco que imaxinamos. É a nosa orixe. Por iso: 'Orígenes: el bolero'.
Gravámolo na nosa terra, na nosa casa, rodeados da nosa familia, dos nosos amigos.
Sen dúbida os tres irmáns coincidimos en dicir que é o álbum 'máis bonito' e persoal que fixemos xamais. Nunca outro nos emocionou deste xeito".

Manuel, Óscar e Raúl Quijano.

VOCES: Manuel, Oscar e Raúl Quijano.
GUITARRAS, REQUINTO E TRES: Manuel Quijano.
CONTRABAIXO: Yelsy Heredia.
PERCUSIÓNS: Richard Bravo.
CHELO: Pelayo Tahoces.
TROMPETA: Fran Rivero en “Prometo” e José Ramón Ignacio Castro en “Qué será de mí”.

Baixo o nome de "Xira dos Mil Concertos", Los Suaves inician unha xira de salas por toda a península na que recuperan temas das décadas douradas dos 80 e 90.

En palabras de Los Suaves, "algúns destes temas non soaban en directo dende hai vinte anos e agora farano renovados. Para os seguidores máis novos vai ser a súa primeira oportunidade de escoitalos en directo e todo un regalo para os máis veteranos".

A artista María Ortega Estepa imparte un obradoiro de tradición oral para nenos de 5 a 10 anos acompañados por un dos seus avós.

O obradoiro consiste en fomentar a tradición verbal dos nosos maiores, e que os nenos e nenas saiban valorar o tesouro que teñen nas súas familias a través dos relatos dos seus avós e avoas.

Os avós contan, os nenos pintan as súas historias.

A actividade pretende achegar aos nenos e nenas á arte contemporánea, ao que hoxe en día se poden encontrar en salas de exposicións, e así reducir a distancia entre os nen@s e as obras de arte en salas ou museos -mediante o achegamento directo co artista- posibilitando un ambiente aberto de diálogo e expresión.

Para: Nenos e nenas de 5 a 10 anos acompañados dun avó ou avoa.

Prezo: 20 € (Avó/a e neno/a)

A Agrupación Cultural O Galo súmase á celebración do Día de Rosalía cun roteiro guiado pola profesora de lingua e literatura Mercedes Espiño, que terá saída na Praza de Vigo ás 17:00 horas. Con esta actividade, a asociación quere sumarse á celebración do Día de Rosalía que a este ano ten unha relevancia moi especial por se cumpriren 150 anos da publicación de 'Cantares Gallegos', o primeiro libro editado completamente en galego que supuxo o renacemento da nosa literatura culta.

Neste roteiro coñeceremos os lugares de Santiago de Compostela que tiveron especial relevancia na vida de Rosalía de Castro: onde naceu, viviu, escribiu e loitou. Será un roteiro a través dunha ducia de puntos da cidade, nos que adicaremos uns momentos a explicar a súa relación con Rosalía ou coa súa obra e aproveitaremos para realizar a lectura dalgún poema.

O hotel NH Obradoiro acolle esta noite unha festa que homenaxea a década dos 80. The Lobby trasládase un ano máis aos mellores anos do noso recordo, cando iamos á EGB, levabamos codeiras e tomabamos Peta Zetas.

Coa mellor música da época, invitámosvos a gozar dunha década fascinante.

Entrada Libre - Co patrocinio de Grupo Noya Automoción e Coca-cola.

Consulta o evento en facebook

Tamén podes cear un orixinal Buffet Retrovisión por só 22 €. A partir das 21:30 h. Chama ao 981 558 070 para facer a túa reserva.

Un ano máis, e durante dúas semanas, o Paseo Central da Alameda alberga a tradicional Feira do Libro Antigo e de Ocasión, que na súa XXII edición conta coa participación de librerías de distintas comunidades españolas, de contrastada calidade, con máis de 100.000 exemplares que se poñerán á venda durante os 15 días de feira.

Dentro do gran número de materiais expostos, poderanse atopar curiosidades bibliográficas editadas nos séculos XVII e XVIII, primeiras edicións de libros de autores dos séculos XIX e inicios do XX (Rosalía, Curros, Valle Inclán, Pardo Bazán, Baroja, Alberti, Neruda, Gómez de la Serna) e documentacións profesionais, carteis, prensa e revistas, todo tipo de materiais impresos, cartas postais, mapas, papel moeda, facsímiles e libros de ocasión que polo seu prezo, poden constituír unha boa equipaxe para as vacacións de verán e para fondo de biblioteca, así como unha excelente ocasión para os coleccionistas e bibliófilos.