Durante estes días de Nadal a Fundación Granell, como ven sendo habitual, monta un Belén particular. Distinto cada ano, mais sempre conformado por pezas dos fondos da colección de arte popular de diferentes lugares do mundo. O Belén da Fundación Granell é singular tamén porque inclúe pezas que nada teñen a ver coas habituais figuriñas de Nadal, adquirindo por iso o toque surrealista representativo da Fundación.

Nesta ocasión, o Belén terá más empaque ao situarse por vez primeira nunha sala de exposicións.

Ademais do Belén, especialmente dedicado ao mundo da infancia, os nenos e nenas que visiten no Nadal a institución poderán contemplar as pezas presentadas ao VII Certamen de Arte Escolar Eugenio Granell, nesta edición dedicado aos mares de Granell. Na exposición  poderán verse obras realizadas por escolares de centros de primaria de toda Galicia. Os espectadores e espectadoras terán a posibilidade de votar en sala para elixir o Premio do Público. Esta exposición permanecerá aberta ata o 17 de xaneiro.

O ciclo 'Cine por dentro', organizado por ARTeria Noroeste conta nesta ocasión coa presenza do realizador madrileño Jonás Trueba, que debutou na dirección da longametraxe 'Todas las canciones hablan de mí', para explicar os segredos da realización desta obra. Tras a proxección haberá un coloquio co público.

O madrileño Jonás Trueba debutou como director con esta longametraxe, tras diversos traballos como co-guionista: 'Más pena que gloria' (Víctor García León, 2000), 'Vete de mí' (2005) ou 'El baile de la victoria' (Fernando Trueba, 2009). Tamén se dedicou á curtametraxe e ao teatro, e escribe o blog de cine 'El viento sopla donde quiere', publicado por El Mundo.

'Todas las canciones hablan de mí' é unha comedia romántica que aborda as crises, encontros e desencontros dunha parella que pertence á última xeración de noivos que escribiron cartas a man. O seu responsable achegarase a ARTeria Noroeste para explicar os segredos da realización desta obra.

O Café Puente continúa esta noite co seu ciclo de citas ineludibles para os amantes da boa música en directo. Os músicos Pablo Seoane (piano) e L.A.R. Legido (batería) serán os encargados destas sesións de free jazz denominadas 'Lupercais'.