Exposición organizada polas Deputacións de A Coruña e Lugo que permite apreciar a vida, os usos e costumes na Corte española, en Galicia e en Nápoles nos séculos XVI e XVII por medio da firgura de Don Pedro Fernández de Castro, un home do seu tempo, desde moi novo acostumado a relacionarse cos personaxes máis poderosos da época.

Don Pedro Fernández de Castro foi un grande amante das artes e das ciencias, así coma un traballador infatigable e un innovador. Foi vicerrei de Nápoles entre 1610 e 1616, onde loitou para eliminar as desigualdades sociais existentes, centrándose na axuda aos necesitados e promovendo as artes e as letras. O seu papel na escena política española merece atención: durante a súa etapa coma Presidente do Consello de Indias preocupouse por mellorar ás xentes baixo a súa xurisdición, fomentando o comercio e o progreso. Loitou por lograr o voto en Cortes para Galicia, representada por Zamora, e no seu territorio de Monforte preocupouse ata a súa morte por mellorar os oficios existentes, poñendo en marcha iniciativas que aínda hoxe nos deixan sorprendidos.

 Foi, tamén, un gran mecenas que protexeu a escritores e artistas españois e italianos, entre os que destacan Miguel de Cervantes ou Luís de Góngora.

En 2012 celébrase o terceiro centenario da morte de Domingos de Andrade (Cee, 1639-Compostela 1712). Andrade axudou a facer da arquitectura unha arte nobre e moderna que, con el, adquire en Galicia un desenvolvemento creativo importante partindo da tradición para elaborar formas propias e orixinais.

O Museo do Pobo Galego, que ten a súa sede en San Domingos de Bonaval, unha das obras máis destacadas de Andrade, celebra a efeméride cunha exposición conmemorativa, comisariada por Manuel Vilar Álvarez. Co mesmo motivo editarase un libro sobre Andrade e a Galicia do seu tempo, que conta con achegas dos profesores Ofelia Rey Castelao, Alfredo Vigo Trasancos, Manuel Taín Guzmán e Alberto Sanjurjo, ademais do comisario da mostra.

Fillo de Domingos López de Andrade e da súa segunda muller, Alberta López, nace en Cee en 1639, no seo dunha familia de orixe fidalga e posición acomodada.
En 1654 figura matriculado na facultade de Artes da universidade compostelá, aínda que en 1655 aparece inscrito na carreira de Canons e Leis.
O seu traballo na catedral principia cara a 1662, participando na construción do novo altar maior. O seu nome aparece relacionado por primeira vez nos libros de fábrica en 1665, cando con Lucas Serrano asina o contrato para a construción do tabernáculo.

Ata 1674 colabora con Juan de la Peña Toro, mestre de obras de carpintería e de cantaría da catedral. Con el viaxa por Galicia e aprende o oficio de arquitecto, sucedéndoo logo da súa morte. Como mestre, Andrade formará a ilustres arquitectos, como Jerónimo Patiño, Miguel de Romay, Simón Rodríguez, Fernando de las Casas Novoa ou Lucas Caaveiro. Traballa por toda Galicia, dirixindo obras en edificios relixiosos, civís e militares.

Pero será en Compostela onde Domingos de Andrade desenvolverá o seu traballo principal e onde o seu xenio creativo acadará a máxima expresión.
Na catedral participa na construción da nova sancristía, que despois será Capela do Pilar, e do Pórtico Real, así como na reforma da capela do Espírito Santo e da parte superior da Porta Santa. A súa obra cimeira é o deseño e construción da Torre do Reloxo, na que vai expresar libremente a súa linguaxe estética e decorativa con froitas, motivos militares e xacobeos, simetrías, luces e formas.

En Compostela, Andrade constrúe edificios para vivenda; velaí a Casa da Parra, a da Conga, ambas na Quintana, ou a do actual número 16 da rúa Nova; traballa para institucións como o Hospital Real, a Universidade ou o concello, deseñando planos e intervindo na construción de edificios públicos como o da Carnicería. Deseña os retablos de San Paio de Antealtares e de Santa Clara.

No convento de San Domingos de Bonaval realiza unha das intervencións máis singulares. A máis da fachada principal e de tres panos do claustro, Andrade é o autor desa peza fermosa e única formada polas escaleiras que comunican os cuartos dun e outro lenzo do claustro. Bucle funcional que xoga ás simetrías, a orixinalidade da escaleira vai máis alá da estética e do criterio innovador do seu deseño. Dende o balcón no que remata, Andrade suxírenos un cambio de perspectiva, un novo xeito de mirar e de ver, xa que, ata entón, a visión da paisaxe procurábase dende o interior da cidade, pero agora, esta transfórmase en centro e referencia visual.

En 1699, viúvo, Andrade solicita o ingreso na orde sacerdotal. Tras unha longa enfermidade, falece o 12 de novembro de 1712, na súa casa do Pombal. Os seus restos repousan na Capela da Concepción da catedral compostelá.

Chisco Naval
Extracto do guión do vídeo

A Igrexa das Ánimas acolle o segundo dos concertos programados polo VI Festival de Músicas Contemplativas para esta xornada. Il Complesso Barocco, formación holandesa dirixida por Alan Curtis, ofrecerá a interpretación de diversos responsorios de Xoves Santo.

Il Complesso Barocco. Fundado en Amsterdam en 1979 por Alan Curtis, un dos especialistas máis aclamados na interpretación de música prerromántica, converteuse nunha orquestra barroca de renome internacional, especializada en ópera e oratorios do Barroco italiano. O seu alto nivel de interpretación, a entonación e a exactitude estilística levouna a ser solicitada regularmente nas principais salas de concerto e festivais de Europa e América.
O director Werner Herzog escolleu ao conxunto como protagonista para a súa película “Morte a cinque voci” (Prix Italia 1996 e Premio Rembrandt, Amsterdam 1996) dedicada ao compositor Carlo Gesualdo. Il Complesso Barocco tamén gravou o Primeiro Libro do Madrigal de Michelangelo Rossi (cualificado como “increiblemente belo “ por The Guardian) e concedéronlle o Preis der Schallplattenkritik Alemán e o Premio de Gravación Internacional “Antonio Vivaldi”.
Il Complesso Barocco, xogou un papel fundamental na recuperación de óperas Barrocas, sobre todo de Monteverdi, Vivaldi e Handel. “Admeto”, a primeira ópera de Handel, foi recuperada con instrumentos orixinais, incluíndo a tiorba, sendo dirixido por Alan Curtis no Concertgebouw de Amsterdam en 1979 e gravada por EMI, obra moi eloxiada.
Proximamente a orquestra presentará unha xira e gravará “Giove in Argo” de Handel, un recital con Ann Hallenberg e un programa de arias e dúos de Handel en torno ao bestiario con textos de Donna León.

PROGRAMA

Responsoria: FERIA V. Responsorios para el Jueves Santo. In Coena Domini
- Toccata Prima del Iº tomo finto
Giovanni Salvatore
- I Responsorio
Gesualdo
- Durezze e Ligature
Giovanni Salvatore
- II Responsorio
Gesualdo
- Canto Fermo Secondo del secondo tono (del libro IIº)
Giovanni Maria Trabaci
- III Responsorio
Gesualdo
- Toccata Quarta (del Iº libro)
Ascanio Mayone
- IV Responsorio
Gesualdo
- Consonanze Stravaganti
Giovanni de Macque
- V Responsorio
Gesualdo
- Seconda Stravaganza
Giovanni de Macque
- VI Responsorio
Gesualdo
- Canto Fermo Secondo del secondo tono (del libro IIº)
Giovanni Maria Trabaci
- VII Responsorio
Gesualdo
- Ricercar
Giovanni de Macque
- VIII Responsorio
Gesualdo
- Verso Primo per il Sanctus delle Domeniche
Giovanni Salvatore

Durante a Semana Santa de 2011 diferentes igrexas da cidade histórica de Santiago de Compostela acollerán a sexta edición do Festival de Músicas Contemplativas, un certame musical que aposta polo diálogo intercultural no que participarán trece agrupacións representativas de distintas tradicións musicais de Oriente e Occidente e das súas espiritualidades.

O Consorcio de Santiago e a Asociación Musical Berenguela presentan o Compostela Organum Festival, ciclo de verán, unha iniciativa que promove a acción cultural no patrimonio histórico de Santiago a través de catro concertos en diversas igrexas da cidade vella. Entre os músicos que participarán destacan Canco López, Gianluca Libertucci, Norbert Petry e o grupo Tasto Solo.

PROGRAMA

- Sábado 8 de outubro, 20:30 h. Igrexa da Universidade
Tasto Solo
“Os ministriles de teclado na corte de Juan I de Aragón”
Johan dels Orguens

- Domingo 16 de outubro, 20:30 h. Igrexa de San Paio de Antealtares
Ars Combinatoria
Canco López, director
“J.S. Bach, concertos e cantatas”

- Sábado 22 de outubro, 21:00 h. Catedral
Gianlucca Libertucci, órgano
Bach, Liszt, Franck

- Sábado 29 de outubro, 20:30 h. Igrexa da Universidade
Norbert Petry, órgano
 “Glosas, danzas e variacións”

Durante a Semana Santa 2012, o Concello de Santiago organiza un programa musical que engloba 9 concertos que se celebrarán na igrexa da Universidade, agás un que será no Auditorio de Galicia.

O programa de concertos, que se celebra do 4 ao 8 de abril, presenta unha ampla variedade musical, indo dende a época medieval ata o Barroco, con algunha incursión no Romanticismo e no século XX. Todos os músicos teñen vinculación con Galicia.
Este programa foi elaborado desde a concellería de Cultura para completar a programación cultural da Semana Santa logo de confirmarse que este ano non se podería celebrar o Festival de Músicas Contemplativas. Así, traballouse nun programa variado no que todos os artistas teñen algunha relación con Galicia, ben porque son galegos, ben porque desenvolven a súa actividade no noso país.

PROGRAMA

** Mércores 4 de abril
- 21 h. Igrexa da Universidade. Coro Vox Stellae, dirixido por Luis Martínez e co organista Joaquín Barreira. Neste concerto, que se fai en colaboración do Centro Checo, estrearase unha Misa que Antonin Tucapsky dedicou a Compostela.

** Xoves 5 de abril
- 20 h. Igrexa da Universidade. Concerto a cargo de Ars Combinatoria, que presenta Quando fuere menester glosar, música renacentista e poesía do Século de Ouro español.
- 22 h. Igrexa da Universidade. Recital de Germán Díaz, zanfonista que  presenta un novo método musical, o cardiofónico, baseado nos latexos do corazón.

** Venres 6 de abril
- 20 h. Igrexa da Universidade. Malandança. Lírica mariana dos trobadores galegos e franceses con Malandança, dirixida por Francisco Luengo.
- 22 h. Igrexa da Universidade. Diego Ares. Tesouros clavenicísticos.

** Sábado 7 de abril
- 20 h. Igrexa da Universidade. Ars Atlántica presenta Dulce desdén, cancións e danzas da idade dourada, s. XVI e XVII.
- 22 h. Igrexa da Universidade. Concerto de violín barroco con Amandine Beyer, que presenta un programa de obras de Bach, partitas e sonatas.

** Domingo 8 de abril
- 19 h. Auditorio de Galicia. Concerto da Orquestra Nova e a Orquestra de Nenos da Sinfónica de Galicia.
- 21:30 h. Igrexa da Universidade. Resonet presenta Il Sole et Luna, músicas e sonetos do barroco ibérico para o tempo de Paixón, onde poderemos escoitar á soprano Mercedes Hernández xunto cos músicos Paulo González, Carlos Castro e Fernando Reyes e cunha colaboración do actor Evaristo Calvo.

A zona "C" acolle esta tarde unha nova cita musical dentro do festival Via Stellae. Nesta ocasión, o público asistirá á presentación do novo trío La Bellemont, cun programa de música barroca interpretado con viola da gamba, tiorba e clave.

'La voix de la viole, Marin Marais'

LA BELLEMONT

Sara Ruiz  viola da gamba
Rafael Muñoz  tiorba
Laura Porto  clave

Marin Marais (1656-1728)

PROGRAMA

Muzette
Caprice ou Sonate
Plainte
Rondeau
Tombeau pour Mr. de Saint Colombe
Prelude & Chaconne  (Robert de Visèe, c. 1650-c. 1732)
Folies d’Espagne
Chaconne pour le clavecin  (Gaspar Le Roux, c. 1660-c. 1720)
La Rêveuse

La Bellemont. Tras varios anos colaborando profesionalmente con prestixiosos grupos de música antiga (Al Ayre Español, Camerata Iberia, Orquesta Barroca de Sevilla, Armonico Tributo Austria, Los músicos de su Alteza…), Sara Ruiz, Rafael Muñoz e Laura Porto, crean o ensemble La Bellemont coa intención de fundir nunha nova formación as súas pretensións de lograr un son de grupo completamente persoal producindo interpretacións baseadas nunha gran solvencia técnica e un grao máximo de implicación coa música que conseguisen conmover ao oínte. Con estas premisas afrontan o seu primeiro proxecto discográfico La voix de la viole ao redor da obra de Marin Marais. O traballo final foi xenerosamente aclamado pola crítica internacional, conseguindo o galardón de “Cinco diapasóns” que concede a prestixiosa revista francesa Diapasón.

Como complemento a actividade musical, o VII Festival de Músicas Contemplativas organiza este ano a ruta dos Espazos para a reflexión, de maneira que un grupo de igrexas permanecerán abertas durante os días do Festival, permitindo que veciños e visitantes poidan trazar a súa propia ruta e descubrir o rico patrimonio que atesouran estes templos e as confrarías que nelas teñen as súas sedes.

** Santa María do Camiño
As orixes desta igrexa remóntanse ao século XV, mantendo esta estrutura ata o século XVI. A mediados do XVIII e nas primeiras décadas do XIX é cando sofre unha profunda transformación. O retablo maior foi trazado polo entallador Manuel de Leis en 1758, encargándose das esculturas Benito Silveira. Destaca no seu interior o tímpano coa escena da Epifanía, que procede do templo medieval.

22-31 marzo: 11 h-13:30h e 16 h-19 h

Sede da Confraría da Humildade. Procesión: Luns Santo, 21:30h.

Festival de Músicas Contemplativas. 22 de marzo, 19:30h. Jiri Bárta violoncello.

** Igrexa das Ánimas
Érguese segundo os planos do arquitecto Miguel Ferro, sobre un terreo irregular, sendo o mestre de obras Juan López Freire. Templo cunha nave única, articulada en capelas laterais que orixinan un sistema de comunicación perimetral entre elas, onde se representa un programa iconográfico sobre o Vía Crucis, realizado polo escultor Manuel de Prado e Mariño, entre 1803 e o 1814, que segue un discurso iconolóxico ideado polo seu irmán o arquitecto Melchor de Prado e modelado en estuco veneciano.

22-31 marzo: 11 h-13:30h e 16 h-19 h

Sede da Confraría da Esperanza. Procesión: Domingo de Ramos, 18h.

Festival de Músicas Contemplativas. 25 de marzo, 19:30h. Accademia del Piacere / 30 de marzo, 20h. Resonet

** Igrexa de San Bieito do Campo
De orixe medieval reconstruíuse a finais do XVIII seguindo os planos de Melchor de Prado Mariño con planta de salón, unha soa nave con bóveda de canón, presbiterio con cuberta de canón e cuarto de esfera e capela maior, abrindo nos muros laterais oito altares. Destes destaca o que abeira o tímpano gótico da Epifanía e o relevo da Visitación. A capela maior está decorada con cadros ao óleo e pinturas ao fresco do pintor academicista Plácido Fernández Arosa, recentemente restauradas.

22-31 marzo: 11 h-13:30h e 16 h-19 h

Festival de Músicas Contemplativas. 27 de marzo, 22h. Grupo de cámara da Real Filharmonía: Trío de cordas

** San Félix de Solovio
Esta igrexa está estreitamente unida ao descubrimento do corpo do Apóstolo Santiago, pois, segundo a tradición, aquí se encontraba orando o eremita Pelayo, cando enxergou as luminarias que lle indicaban o lugar onde se encontraba o sepulcro apostólico. Reedificada polo bispo Sisnando, foi destruída por Almanzor no 997 pero reconstruída polo bispo Pedro de Mezonzo e por Xelmírez no 1122 seguindo a tipoloxía típica dunha construción románica dunha nave e teitume de madeira. Nos séculos XVII e XVIII engadíronse unha serie de pequenas capelas alterando a súa configuración orixinal quedando coas tres naves actuais. No tímpano da súa portada consérvase un fermoso relevo da Epifanía, de 1316.

Sábados, 16h.

Festival de Músicas Contemplativas. 24 de marzo, 21:30h. Ars Atlántica.

** San Fructuoso
A construción da igrexa parroquial de San Fructuoso (ou Nosa Señora da Angustia de Abaixo) é obra de Lucas Ferro Caaveiro realizada entre 1754 e 1765. Érguese sobre o terreo que antes ocupaba a capela da Vera Cruz. O retablo maior constrúese cara a 1769 segundo as trazas de Luis Lorenzana, quen nos deixou nos capiteis das columnas a orde española, ideada por el. Os retablos colaterais do cruceiro contrátanse en 1783 a Francisco Lens.

22-31 marzo: 11 h-13:30h e 16 h-19 h

Festival de Músicas Contemplativas. 29 de marzo, 20h. Grupo de Cámara da Sinfónica de Galicia: Cuarteto Atlántico.

** Colexiata de Santa María de Sar
As orixes da súa fundación como mosteiro agostiño debense a Munio Alfonso, estreito colaborador do arcebispo Xelmírez, comezando as obras no século XII. A inclinación dos seus piares debido probablemente a un erro na construción e ao terreo pantanoso sobre o que se levanta, é un dos atractivos deste edificio románico; este feito resumiuno perfectamente o poeta Gerardo Diego cando escribiu: La colegiata del Sar / se tambalea de sueño. / Sueña que se va a acostar / y que el cielo es muy pequeño. No século XVIII refórzase a edificación cuns enormes e macizos arcobotantes, pois ameazaba con derrubarse. Do primitivo claustro románico tan só se conservan nove arcos no seu lado norte.

22-31 marzo: 11 h-13:30h e 16 h-19 h

Festival de Músicas Contemplativas. 27 de marzo, 20h. Eloqventia.

** Santo Domingo de Bonaval
Segundo a tradición, foi Santo Domingo de Guzmán quen fundou, a principios do século XIII, este convento. En 1230 xa se consagra a igrexa que se amplía a finais do mesmo século, renovándose por completo a súa cabeceira. Entre os séculos XVI e XVIII realízanse novas obras na igrexa, cámbianse as cubertas de madeira por outras de pedra, ábrense capelas, levántanse retablos e constrúese o coro alto. Domingo de Andrade traza as liñas do retablo maior, desmontado e trasladado á igrexa parroquial de Santiago, en Carril. Na nave do Evanxeo encóntrase o Panteón de Galegos Ilustres, cos sepulcros de Rosalía de Castro, Alfredo Brañas, Domingo Fontán, Francisco Asorey, Ramón Cabanillas e, moi preto, Castelao.

22-31 marzo: Martes a sábado: 10:30h-14 h e 16 h-19:30h. Domingos e festivos: 11 h-11h-14h. Luns pechado. (Entrada por Museo do Pobo Galego).

Sede da Confraría do Rosario. Procesión do Santo Enterro: Venres Santo, 20h.

Festival de Músicas Contemplativas: 26 de marzo, 20:30h. Zefiro Baroque Orchestra. / 28 de marzo, 21h. Divna Ljubojevic e Coro Mélodi.

** Santa María de Conxo
A primitiva igrexa relaciónase co arcebispo Xelmírez, quen a consagra en 1129; desta obra consérvanse restos do claustro. No XVII iníciase a reedificación do convento e acométense as obras do claustro, que rematan en 1651. En 1669 realízanse as obras da igrexa atribuída a varios autores como Fernández Lechuga, fray Gabriel de Casas, Melchor de Velasco ou Diego de Romay. En 1729 inícianse as obras da nova capela do Cristo que acolle a imaxe do crucificado, obra de Gregorio Fernández. Esta capela e retablos son obra de Simón Rodríguez.

22-31 marzo: 11 h-13:30h e 16 h-19 h

Sede da Confraría do Santo Cristo da Paciencia. Procesión: Martes Santo, 21h. (saída do Convento das Mercedarias).

Festival de Músicas Contemplativas. 24 de marzo, 19:30h. Real Filharmonía de Galicia. Maximino Zumalave director.

** San Francisco
A súa orixe relaciónase co santo de Asís cando peregrinou a Compostela cara o ano 1213-14. A igrexa actual levantouse sobre os terreos da precedente, da que apenas quedaron vestixios. Cara a 1730 a igrexa ameaza ruína, polo que en 1740 se decide unha nova construción máis ampla con planos de Simón Rodríguez, quen dirixe as obras ata a súa morte en 1752, concluíndose en 1787. Presenta unha planta de cruz latina, con amplos presbiterio e sancristía. As capelas abertas a ambos os dous lados, ao estar comunicadas entre si, dan a sensación de naves laterais.

22-31 marzo: 11 h-13:30h e 16 h-19 h

Sede da Confraría da Vera Cruz. Procesión da Última Cea: Xoves Santo, 19h. Procesión de Xesús Resucitado: Domingo de Pascua, 11 h

Orde Franciscana Segrar. Procesión da Entrada en Xerusalén: Domingo de Ramos, 11h.

Festival de Músicas Contemplativas. 23 de marzo, 21:30h. Los caminos de Serkeci.

** San Martiño Pinario
A igrexa foi trazada polo arquitecto portugués Mateo López a finais do século XVI. Esta magna obra e a do mosteiro foi continuada por un número considerable de mestres como Ginés Martínez, González de Araújo, Peña de Toro, Bartolomé Fernández Lechuga, Gabriel de Casas, Tomás Alonso ou Fernando de Casas. A Mateo López débeselle a formulación xeral da obra, o que o leva a configurar o esquema na súa totalidade. A inmensa nave central está cuberta con bóveda de canón con falsos casetóns. Tamén hai que resaltar os magníficos retablos que posúe e o cadeirado do coro baixo. O retablo do altar maior (1730) e os dous do cruceiro son deseño de Fernando de Casas executándoos o entallador Miguel de Romay.
22-31 marzo: 11 h-13:30h e 16 h-18:30h (Entrada: 2,50 euros)

Festival de Músicas Contemplativas. 23 de marzo, 19:30h. Coro Novo e Nenos Cantores da Sinfónica de Galicia.

** Santa María Salomé
Fundada cara a 1140 con nave única e teito de madeira, da fábrica medieval apenas quedan restos, pois foi reformada no barroco ao engadírselle unha serie de capelas. Na portada destacan as imaxes dunha Anunciación, con María á esquerda e o anxo á dereita e sobre a clave a Virxe do Leite. O interior é de planta cadrada con cúpula de media laranxa sobre pendentes. En 1743 levántase o campanario que segue as trazas do da igrexa de San Félix. O pórtico de entrada é do século XVI.

Horario de culto

Sede da Confraría da Virxe da Soidade. Procesión da Virxe da Soidade: Venres Santo, 23h.

** San Miguel dos Agros
A data da fundación desta igrexa descoñécese. Sábese que en época de Diego Xelmírez (1122) se reconstrúe. O interior é de tres naves con cuberta de bóveda de aresta na central; as capelas da Dolorosa e o Nazareno cóbrense con bóveda de canón e a Da nosa Señora e san Xerónimo péchase con bóveda de crucería estrelada. O retablo maior é obra de 1786. A fachada da igrexa segue os canons das igrexas neoclásicas.

22-31 marzo: 11 h-13:30h e 16 h-19 h

Sede da Confraría Do noso Pai Xesús Nazareno e a Santa Virxe das Dores. Procesión da Virxe das Dores: Venres 22 de marzo, 21h. Procesión do Encontro: Venres Santo, 11 h (dende a praza da Quintana).

** San Agostiño
Levántase sobre o terreo que ocupaba a igrexa de Nosa Señora da Cerca. Na súa construción participan Francisco González Araújo, Bartolomé Fernández Lechuga e os Jácome Fernández, pai e fillo. Lévase a cabo a construción -segundo trazas de Lechuga- no primeiro terzo do século XVII. O interior é de planta de cruz latina inscrita nun rectángulo dunha soa nave, con capelas laterais, cruceiro e cúpula que realiza Jácome Fernández fillo. Do conxunto escultórico da igrexa hai que sinalar o gran talle procesional de Xesús Flaxelado, vinculada á forma de traballar de Diego de Sande e peza fundamental nas procesións da Semana Santa compostelá.

22-31 marzo: 9 h-12:45h e 18:15h-19:45h

Sede da Confraría de Noso Pai Xesús Flaxelado. Procesión de Xesús Flaxelado: Xoves Santo, 23:30h.

** Igrexa do Convento de Santa Clara
A orixe do convento de Santa Clara remóntase á segunda metade do século XIII, atribuíndose a súa fundación á raíña dona Violante de Castilla, esposa de Alfonso X o Sabio. Do primitivo edificio apenas quedan restos, xa que foi moi modificado entre os séculos XVII e XVIII. Os seus principais arquitectos foron Domingo de Andrade, fray Gabriel de Casas, Pedro de Arén e, sobre todo, Simón Rodríguez. O retablo maior foi labrado por Bugarín a principios do século XVIII, seguindo trazas de Andrade. A fachada principal -de gran plasticidade urbana-, trazada por Simón Rodríguez, destaca pola súa orixinalidade, xa que non nos leva ao interior da igrexa, senón que dá paso a un patio onde si se encontra a entrada á igrexa propiamente dita.

22-31 marzo: 11 h-13:30h e 16 h-19 h

** San Roque
A orixe desta pequena capela está na promesa feita polo Cabido e o Concello en 1520 como acción de grazas a San Roque por librar da peste á cidade. A igrexa remátase en 1576 e un ano máis tarde o arcebispo Francisco Blanco funda o hospital, para "curar e procurar remedio aos pobres enfermos das bubas e outros males... ". No interior da pequena igrexa podemos ver un gran retablo de Simón Rodríguez, quen entrega as trazas en 1742 executándoo Romay. Este fermoso retablo está formado por unha parte central de tres corpos e dous laterais, recorda o retablo da igrexa da Compañía. Os dous corpos laterais avanzan cara ao espectador como querendo facernos partícipes da súa imaxinaría.

22-31 marzo: 11 h-13:30h e 16 h-19 h

** Igrexa do Convento do Carmen
O convento fundado pola nai María Antonia de Jesús, coñecida como "A monxiña do Penedo", a mediados do século XVIII e foi o primeiro que esta orde tivo en Galicia. Érguese sobre os terreos que pertenceron ao conde de Priegue. O proxecto para a obra débese a Fray José de los Santos. O 23 de outubro de 1758 as Nais Carmelitas trasládanse dende a súa casa en San Roque a este novo edificio. O interior da igrexa, de arquitectura sinxela -que comunga con consignas desta orde como a austeridade e sobriedade- é de planta de cruz latina. Non obstante esta sinxeleza construtiva non resta monumentalidade ao conxunto, acrecentada pola bóveda de canón reforzada por arcos faixones e a cúpula cega de media laranxa no cruceiro. O retablo maior contrátase en 1800 e segue un deseño neoclásico no que se imita, por medio da policromía, mármores xaspeados e bronces nos capiteis das catro columnas de orde composta.

22-31 marzo: 11 h-13:30h

** Igrexa das Orfas
As trazas encárganselle ao arquitecto Melchor de Velasco cara a 1664, quen deseña un interior dunha soa nave, capela maior rectangular e cabeceira recta cunha sancristía a cada lado. A sobriedade é a nota principal do seu interior arquitectónico, alterada pola traza do seu retablo actual, obra que Francisco de Lens contrata en 1756 e no que traballará José Gambino, realizando as imaxes de san José, san Francisco e a do Apóstolo Santiago. No lado da epístola, no muro do cruceiro encontramos o monumento fúnebre do cardeal Martín de Ferreira obra do escultor Francisco Asorey.

22-31 marzo: 9 h-13:30h e 17:30h-19 h

Sede da Irmandade do Stmo Cristo da Misericordia. Procesión dos Estudantes: Mércores Santo, 23h.

** Capela de Nosa Señora do Portal - Convento de Belvís
Foron os dominicanos de Bonaval os que suscitaron a súa fundación en 1306, como o primeiro convento feminino da súa orde en Galicia. O edificio sofre ampliacións durante o século XVII, como a capela da Virxe do Portal, dunha soa nave e cúpula sobre o camarín da Virxe. A capela levantouse grazas ás esmolas dos fieis, pola crenza nas propiedades curativas dunha fonte que alí se localiza.

22-31 marzo: 11 h-13:30h e 16 h-19 h

** San Paio de Antealtares
A construción da igrexa iniciouse en 1700 no terreo que ocupaba a anterior que foi derrubada. A obra encárgaselle ao arquitecto bieito fray Gabriel de Casas proseguíndoas Pedro García que a conclúe en 1707, seguindo as trazas de Casas. A planta é de cruz grega con dous brazos curtos no cruceiro; aos pés, o brazo é máis alongado para acoller o coro. Entre 1708 e 1714 procédese a executar os retablos da igrexa. Érguense primeiro os retablos colaterais e o maior en último lugar. Hai que destacar que tanto o retablo relicario -trazado por Andrade- como o púlpito -obra de Diego de Romay- pertencían ao mobiliario da antiga igrexa.

22-31 marzo: 11 h-13:30h e 16 h-19 h

** Igrexa da Universidade
A igrexa da Compañía (Xesuítas) ou da Universidade levántase a mediados do século XVII sobre o terreo que antes ocupaba a medieval de Santa María a Nova. Ten planta de cruz latina inscrita nun rectángulo, con tribuna sobre as capelas laterais, nave abovedada, cúpula gallonada e lanterna rematando o cruceiro. A importancia desta igrexa reside no seu interior, nos retablos que adornan o altar maior, o cruceiro e as naves laterais. O do altar maior foi contratado en 1727 con Miguel de Romay, Ignacio Romero e Diego de Sande e segue as trazas que deseñou Simón Rodríguez.

Festival de Músicas Contemplativas: 22 de marzo, 22h. Jiri Bárta violoncello / 25 de marzo, 21:30h. Grupo instrumental Século XX / 29 de marzo, 22h. Il Concordu d'Orosei / 30 de marzo, 22h. Neopercusión

Este ano conmemóranse os 300 anos do falecemento do arquitecto barroco Domingo de Andrade (1639-1712). Neste sentido, dende a Catedral de Santiago organizouse un acto para recordalo, que terá lugar no Centro Cultural Novacaixagalicia e consistirá nunha conferencia a cargo do profesor da USC Miguel Taín, un dos mellores expertos na arte da Catedral de Santiago, especialmente no ámbito do barroco. Taín ten publicados numerosos libros sobre este tema, entre os que destaca, precisamente, o seu estudo sobre Andrade, no que analiza o seu papel como mestre de obras da Catedral entre 1676 e 1712.

Andrade está considerado como un xenio da arte barroca en Galicia. Os seus traballos, entre os que destaca a Torre do Reloxo da Catedral, cambiaron a fisionomía da cidade de Santiago a finais do século XVII contribuíndo a conformar a imaxe barroca que hoxe conservamos. Tamén foi autor de obras tan significativas como a Casa da Conga, a tripla escaleira de caracol do convento de Bonaval ou a capela do Pilar, na Catedral.

Con este centenario coincide tamén a finalización das obras de restauración da Torre do Reloxo, enmarcadas no Plan Director da Catedral de Santiago.

Esta tarde o Museo do Pobo Galego organiza un obradoiro para familias e nenos a partir de 7 anos sobre a ciencia nos tempos de Domingos de Andrade. Facer unha lente de microscopio, vestirse como un médico da época, soltar un globo aerostático, experimentar coas pilas de Volta ou órgano eléctrico artificial, o reloxo de escape ou primeiro reloxo mecánico... estes e outros elementos da ciencia do século XVII formarán parte deste obradoiro que dirixirá Xosé Valtierra, coordinador do programa didáctico do Museo do Mar de Galicia e do Centro de interpretación arqueolóxica Salinae.

As prazas son limitadas e a matrícula gratuíta para persoas socias. Para o resto o prezo é de 2 €.

Para máis información ou reservar praza:
Educación e Acción Cultural do MPG: (0034)981583620

Esta tarde a nova sede do Museo das Peregrinacións e de Santiago, na praza de Praterías, acolle a presentación do libro 'Barroco. La arquitectura sagrada del antiguo Reino de Galicia (1658-1763)', editado polo Consorcio de Santiago en colaboración con Teófilo Edicións. O acto inclúe unha breve conferencia a cargo do autor, Alfredo Vigo.

A publicación é un profundo estudo levado a cabo polo profesor Alfredo Vigo sobre a arte barroca en Galicia, no que incorpora as últimas investigacións no tema e no que converxen aspectos non só estritamente artísticos, senón tamén históricos e sociodemográficos, ofrecendo unha visión completa do asunto.

Alfredo Vigo, catedrático de historia da arte pola Universidade de Santiago, defende neste estudo que a evolución do estilo barroco en Galicia en xeral, e en Santiago en particular, supón unha renovación sistemática que non foi froito dunha casualidade, senón dunha clara intención histórica.

O libro repasa aspectos históricos trascendentais para o desenvolvemento da arte barroca en Galicia como foi a institución da Ofrenda Real ao Apóstolo Santiago, que permitiu en boa medida a impresionante transformación arquitectónica da basílica xacobea e, en paralelo a ela, do urbanismo compostelán.

Este libro ve a luz precisamente no ano que se conmemora o terceiro centenario do pasamento de Domingo de Andrade, sen dúbida un dos mellores artistas barrocos e autor de innumerable obras artísticas, entre as que destaca a Torre do Reloxo da Catedral de Santiago.

Esta tarde a nova sede do Museo das Peregrinacións e de Santiago, na praza de Praterías, acolle a presentación do libro 'Vega y Verdugo, Peña de Toro y la introducción del barroco en Compostela', editado polo Consorcio de Santiago en colaboración con Teófilo Edicións. O acto inclúe unha breve conferencia a cargo do autor, Simón Vicente.

A publicación deste libro supón sacar á luz as últimas investigacións en materia de arte barroca en Compostela. O seu autor, o historiador Simón Vicente, estudou durante varios anos unha ampla documentación, depositada na súa meirande parte no arquivo da Catedral de Santiago, a partir da cal puido elaborar diversas teorías sobre como as figuras do cóengo Vega y Verdurgo e do arquitecto Peña de Toro lograron iniciar en Compostela un estilo artístico totalmente novo, acorde coas novas ideas barrocas da contrarreforma e que marcou toda a arte galega posterior, de maneira que hoxe Compostela non se pode entender sen o seu particular estilo barroco, presente en todos os ámbitos do seu urbanismo.

O libro é o resultado da tese doutoral de Simón Vicente, que aborda o pasado compostelán que coñeceu no barroco unha verdadeira idade de ouro. Un traballo, produto dun brillante exercicio académico, que é unha obra que se inscribe nas grandes aportacións que se fixeron á historia do barroco español. O autor reconstrúe o perfil profesional dos devanditos protagonistas e os seus proxectos innovadores que implantaron un novo credo artístico e contribuíron co paso do tempo á transformación estética da cidade e da súa Catedral.

Estamos diante dun traballo que fala das orixes do barroco en Santiago, e que resposta a un dos debates historiográficos máis interesantes no que atinxe non só a transformación e monumentalización do edificio catedralicio, senón tamén da cidade no seu conxunto.

Simón Vicente é autor tamén de Compostela. Una historia entretenida. Atlas histórico ilustrado de Santiago de Compostela, editado tamén polo Consorcio de Santiago.

O ciclo de roteiros guiados 'Fai túa Compostela' programa para esta tarde 'As casas da cidade I', unha actividade na que os participantes poderán observar as pegadas que aínda se conservan desde a Idade Media na arquitectura de Santiago.

Saída: Praza do Hospitaliño de San Roque.
18:00

** Percorridos de aproximadamente 2 horas e media.

** Destinatarios: Grupos e persoas de todas as idades interesadas en teren unha experiencia formativa e lúdica a través dos espazos naturais e culturais do concello de Santiago.

** Idioma: Galego

** Como participar? Poden participar todas as persoas interesadas que reúnan un mínimo de condicións físicas para camiñar ou se sintan capacitadas para desenvolver a actividade.
Os menores de idade deberán acudir acompañados por unha persoa adulta que se faga responsable deles.
As prazas son limitadas: máximo de 20 persoas por roteiro.

** Data límite de inscrición formal: Ata 72 horas antes do roteiro nos Centros Socioculturais (inscrición previa presencialmente ou por teléfono).

Ata xuño de 2013, a rede de Centros Socioculturais de Santiago pon en marcha un completo programa de roteiros didácticos para todos os públicos que percorrerán a cidade compostelá e as súas parroquias. 'Os gremios de Compostela', 'O castelo da Rocha', 'O Barrio de San Pedro', 'Os balcóns da cidade histórica' ou 'As casas da cidade' son só algunhas das propostas incluídas neste novidoso programa.

Os roteiros abranguerán aspectos da nosa cidade como natureza, historia, arte, patrimonio, literatura ou artesanía.

Cultura Viva é un programa educativo promovido pola Concellaría de Centros Socioculturais e Participación Cidadá a través do que coñeceremos o pasado e o presente artístico e cultural de Santiago, desde a tradición á actualidade. Percorrendo edificios, prazas, carballeiras, camiños, regatos... achegarémonos á paisaxe cultural compostelá, descubríndoa e facéndoa nosa.

Máis info aquí

Como complemento a actividade musical, o VII Festival de Músicas Contemplativas organiza este ano a ruta dos Espazos para a reflexión, de maneira que un grupo de igrexas permanecerán abertas durante os días do Festival, permitindo que veciños e visitantes poidan trazar a súa propia ruta e descubrir o rico patrimonio que atesouran estes templos e as confrarías que nelas teñen as súas sedes.

** Santa María do Camiño
As orixes desta igrexa remóntanse ao século XV, mantendo esta estrutura ata o século XVI. A mediados do XVIII e nas primeiras décadas do XIX é cando sofre unha profunda transformación. O retablo maior foi trazado polo entallador Manuel de Leis en 1758, encargándose das esculturas Benito Silveira. Destaca no seu interior o tímpano coa escena da Epifanía, que procede do templo medieval.

22-31 marzo: 11 h-13:30h e 16 h-19 h

Sede da Confraría da Humildade. Procesión: Luns Santo, 21:30h.

Festival de Músicas Contemplativas. 22 de marzo, 19:30h. Jiri Bárta violoncello.

** Igrexa das Ánimas
Érguese segundo os planos do arquitecto Miguel Ferro, sobre un terreo irregular, sendo o mestre de obras Juan López Freire. Templo cunha nave única, articulada en capelas laterais que orixinan un sistema de comunicación perimetral entre elas, onde se representa un programa iconográfico sobre o Vía Crucis, realizado polo escultor Manuel de Prado e Mariño, entre 1803 e o 1814, que segue un discurso iconolóxico ideado polo seu irmán o arquitecto Melchor de Prado e modelado en estuco veneciano.

22-31 marzo: 11 h-13:30h e 16 h-19 h

Sede da Confraría da Esperanza. Procesión: Domingo de Ramos, 18h.

Festival de Músicas Contemplativas. 25 de marzo, 19:30h. Accademia del Piacere / 30 de marzo, 20h. Resonet

** Igrexa de San Bieito do Campo
De orixe medieval reconstruíuse a finais do XVIII seguindo os planos de Melchor de Prado Mariño con planta de salón, unha soa nave con bóveda de canón, presbiterio con cuberta de canón e cuarto de esfera e capela maior, abrindo nos muros laterais oito altares. Destes destaca o que abeira o tímpano gótico da Epifanía e o relevo da Visitación. A capela maior está decorada con cadros ao óleo e pinturas ao fresco do pintor academicista Plácido Fernández Arosa, recentemente restauradas.

22-31 marzo: 11 h-13:30h e 16 h-19 h

Festival de Músicas Contemplativas. 27 de marzo, 22h. Grupo de cámara da Real Filharmonía: Trío de cordas

** San Félix de Solovio
Esta igrexa está estreitamente unida ao descubrimento do corpo do Apóstolo Santiago, pois, segundo a tradición, aquí se encontraba orando o eremita Pelayo, cando enxergou as luminarias que lle indicaban o lugar onde se encontraba o sepulcro apostólico. Reedificada polo bispo Sisnando, foi destruída por Almanzor no 997 pero reconstruída polo bispo Pedro de Mezonzo e por Xelmírez no 1122 seguindo a tipoloxía típica dunha construción románica dunha nave e teitume de madeira. Nos séculos XVII e XVIII engadíronse unha serie de pequenas capelas alterando a súa configuración orixinal quedando coas tres naves actuais. No tímpano da súa portada consérvase un fermoso relevo da Epifanía, de 1316.

Sábados, 16h.

Festival de Músicas Contemplativas. 24 de marzo, 21:30h. Ars Atlántica.

** San Fructuoso
A construción da igrexa parroquial de San Fructuoso (ou Nosa Señora da Angustia de Abaixo) é obra de Lucas Ferro Caaveiro realizada entre 1754 e 1765. Érguese sobre o terreo que antes ocupaba a capela da Vera Cruz. O retablo maior constrúese cara a 1769 segundo as trazas de Luis Lorenzana, quen nos deixou nos capiteis das columnas a orde española, ideada por el. Os retablos colaterais do cruceiro contrátanse en 1783 a Francisco Lens.

22-31 marzo: 11 h-13:30h e 16 h-19 h

Festival de Músicas Contemplativas. 29 de marzo, 20h. Grupo de Cámara da Sinfónica de Galicia: Cuarteto Atlántico.

** Colexiata de Santa María de Sar
As orixes da súa fundación como mosteiro agostiño debense a Munio Alfonso, estreito colaborador do arcebispo Xelmírez, comezando as obras no século XII. A inclinación dos seus piares debido probablemente a un erro na construción e ao terreo pantanoso sobre o que se levanta, é un dos atractivos deste edificio románico; este feito resumiuno perfectamente o poeta Gerardo Diego cando escribiu: La colegiata del Sar / se tambalea de sueño. / Sueña que se va a acostar / y que el cielo es muy pequeño. No século XVIII refórzase a edificación cuns enormes e macizos arcobotantes, pois ameazaba con derrubarse. Do primitivo claustro románico tan só se conservan nove arcos no seu lado norte.

22-31 marzo: 11 h-13:30h e 16 h-19 h

Festival de Músicas Contemplativas. 27 de marzo, 20h. Eloqventia.

** Santo Domingo de Bonaval
Segundo a tradición, foi Santo Domingo de Guzmán quen fundou, a principios do século XIII, este convento. En 1230 xa se consagra a igrexa que se amplía a finais do mesmo século, renovándose por completo a súa cabeceira. Entre os séculos XVI e XVIII realízanse novas obras na igrexa, cámbianse as cubertas de madeira por outras de pedra, ábrense capelas, levántanse retablos e constrúese o coro alto. Domingo de Andrade traza as liñas do retablo maior, desmontado e trasladado á igrexa parroquial de Santiago, en Carril. Na nave do Evanxeo encóntrase o Panteón de Galegos Ilustres, cos sepulcros de Rosalía de Castro, Alfredo Brañas, Domingo Fontán, Francisco Asorey, Ramón Cabanillas e, moi preto, Castelao.

22-31 marzo: Martes a sábado: 10:30h-14 h e 16 h-19:30h. Domingos e festivos: 11 h-11h-14h. Luns pechado. (Entrada por Museo do Pobo Galego).

Sede da Confraría do Rosario. Procesión do Santo Enterro: Venres Santo, 20h.

Festival de Músicas Contemplativas: 26 de marzo, 20:30h. Zefiro Baroque Orchestra. / 28 de marzo, 21h. Divna Ljubojevic e Coro Mélodi.

** Santa María de Conxo
A primitiva igrexa relaciónase co arcebispo Xelmírez, quen a consagra en 1129; desta obra consérvanse restos do claustro. No XVII iníciase a reedificación do convento e acométense as obras do claustro, que rematan en 1651. En 1669 realízanse as obras da igrexa atribuída a varios autores como Fernández Lechuga, fray Gabriel de Casas, Melchor de Velasco ou Diego de Romay. En 1729 inícianse as obras da nova capela do Cristo que acolle a imaxe do crucificado, obra de Gregorio Fernández. Esta capela e retablos son obra de Simón Rodríguez.

22-31 marzo: 11 h-13:30h e 16 h-19 h

Sede da Confraría do Santo Cristo da Paciencia. Procesión: Martes Santo, 21h. (saída do Convento das Mercedarias).

Festival de Músicas Contemplativas. 24 de marzo, 19:30h. Real Filharmonía de Galicia. Maximino Zumalave director.

** San Francisco
A súa orixe relaciónase co santo de Asís cando peregrinou a Compostela cara o ano 1213-14. A igrexa actual levantouse sobre os terreos da precedente, da que apenas quedaron vestixios. Cara a 1730 a igrexa ameaza ruína, polo que en 1740 se decide unha nova construción máis ampla con planos de Simón Rodríguez, quen dirixe as obras ata a súa morte en 1752, concluíndose en 1787. Presenta unha planta de cruz latina, con amplos presbiterio e sancristía. As capelas abertas a ambos os dous lados, ao estar comunicadas entre si, dan a sensación de naves laterais.

22-31 marzo: 11 h-13:30h e 16 h-19 h

Sede da Confraría da Vera Cruz. Procesión da Última Cea: Xoves Santo, 19h. Procesión de Xesús Resucitado: Domingo de Pascua, 11 h

Orde Franciscana Segrar. Procesión da Entrada en Xerusalén: Domingo de Ramos, 11h.

Festival de Músicas Contemplativas. 23 de marzo, 21:30h. Los caminos de Serkeci.

** San Martiño Pinario
A igrexa foi trazada polo arquitecto portugués Mateo López a finais do século XVI. Esta magna obra e a do mosteiro foi continuada por un número considerable de mestres como Ginés Martínez, González de Araújo, Peña de Toro, Bartolomé Fernández Lechuga, Gabriel de Casas, Tomás Alonso ou Fernando de Casas. A Mateo López débeselle a formulación xeral da obra, o que o leva a configurar o esquema na súa totalidade. A inmensa nave central está cuberta con bóveda de canón con falsos casetóns. Tamén hai que resaltar os magníficos retablos que posúe e o cadeirado do coro baixo. O retablo do altar maior (1730) e os dous do cruceiro son deseño de Fernando de Casas executándoos o entallador Miguel de Romay.
22-31 marzo: 11 h-13:30h e 16 h-18:30h (Entrada: 2,50 euros)

Festival de Músicas Contemplativas. 23 de marzo, 19:30h. Coro Novo e Nenos Cantores da Sinfónica de Galicia.

** Santa María Salomé
Fundada cara a 1140 con nave única e teito de madeira, da fábrica medieval apenas quedan restos, pois foi reformada no barroco ao engadírselle unha serie de capelas. Na portada destacan as imaxes dunha Anunciación, con María á esquerda e o anxo á dereita e sobre a clave a Virxe do Leite. O interior é de planta cadrada con cúpula de media laranxa sobre pendentes. En 1743 levántase o campanario que segue as trazas do da igrexa de San Félix. O pórtico de entrada é do século XVI.

Horario de culto

Sede da Confraría da Virxe da Soidade. Procesión da Virxe da Soidade: Venres Santo, 23h.

** San Miguel dos Agros
A data da fundación desta igrexa descoñécese. Sábese que en época de Diego Xelmírez (1122) se reconstrúe. O interior é de tres naves con cuberta de bóveda de aresta na central; as capelas da Dolorosa e o Nazareno cóbrense con bóveda de canón e a Da nosa Señora e san Xerónimo péchase con bóveda de crucería estrelada. O retablo maior é obra de 1786. A fachada da igrexa segue os canons das igrexas neoclásicas.

22-31 marzo: 11 h-13:30h e 16 h-19 h

Sede da Confraría Do noso Pai Xesús Nazareno e a Santa Virxe das Dores. Procesión da Virxe das Dores: Venres 22 de marzo, 21h. Procesión do Encontro: Venres Santo, 11 h (dende a praza da Quintana).

** San Agostiño
Levántase sobre o terreo que ocupaba a igrexa de Nosa Señora da Cerca. Na súa construción participan Francisco González Araújo, Bartolomé Fernández Lechuga e os Jácome Fernández, pai e fillo. Lévase a cabo a construción -segundo trazas de Lechuga- no primeiro terzo do século XVII. O interior é de planta de cruz latina inscrita nun rectángulo dunha soa nave, con capelas laterais, cruceiro e cúpula que realiza Jácome Fernández fillo. Do conxunto escultórico da igrexa hai que sinalar o gran talle procesional de Xesús Flaxelado, vinculada á forma de traballar de Diego de Sande e peza fundamental nas procesións da Semana Santa compostelá.

22-31 marzo: 9 h-12:45h e 18:15h-19:45h

Sede da Confraría de Noso Pai Xesús Flaxelado. Procesión de Xesús Flaxelado: Xoves Santo, 23:30h.

** Igrexa do Convento de Santa Clara
A orixe do convento de Santa Clara remóntase á segunda metade do século XIII, atribuíndose a súa fundación á raíña dona Violante de Castilla, esposa de Alfonso X o Sabio. Do primitivo edificio apenas quedan restos, xa que foi moi modificado entre os séculos XVII e XVIII. Os seus principais arquitectos foron Domingo de Andrade, fray Gabriel de Casas, Pedro de Arén e, sobre todo, Simón Rodríguez. O retablo maior foi labrado por Bugarín a principios do século XVIII, seguindo trazas de Andrade. A fachada principal -de gran plasticidade urbana-, trazada por Simón Rodríguez, destaca pola súa orixinalidade, xa que non nos leva ao interior da igrexa, senón que dá paso a un patio onde si se encontra a entrada á igrexa propiamente dita.

22-31 marzo: 11 h-13:30h e 16 h-19 h

** San Roque
A orixe desta pequena capela está na promesa feita polo Cabido e o Concello en 1520 como acción de grazas a San Roque por librar da peste á cidade. A igrexa remátase en 1576 e un ano máis tarde o arcebispo Francisco Blanco funda o hospital, para "curar e procurar remedio aos pobres enfermos das bubas e outros males... ". No interior da pequena igrexa podemos ver un gran retablo de Simón Rodríguez, quen entrega as trazas en 1742 executándoo Romay. Este fermoso retablo está formado por unha parte central de tres corpos e dous laterais, recorda o retablo da igrexa da Compañía. Os dous corpos laterais avanzan cara ao espectador como querendo facernos partícipes da súa imaxinaría.

22-31 marzo: 11 h-13:30h e 16 h-19 h

** Igrexa do Convento do Carmen
O convento fundado pola nai María Antonia de Jesús, coñecida como "A monxiña do Penedo", a mediados do século XVIII e foi o primeiro que esta orde tivo en Galicia. Érguese sobre os terreos que pertenceron ao conde de Priegue. O proxecto para a obra débese a Fray José de los Santos. O 23 de outubro de 1758 as Nais Carmelitas trasládanse dende a súa casa en San Roque a este novo edificio. O interior da igrexa, de arquitectura sinxela -que comunga con consignas desta orde como a austeridade e sobriedade- é de planta de cruz latina. Non obstante esta sinxeleza construtiva non resta monumentalidade ao conxunto, acrecentada pola bóveda de canón reforzada por arcos faixones e a cúpula cega de media laranxa no cruceiro. O retablo maior contrátase en 1800 e segue un deseño neoclásico no que se imita, por medio da policromía, mármores xaspeados e bronces nos capiteis das catro columnas de orde composta.

22-31 marzo: 11 h-13:30h

** Igrexa das Orfas
As trazas encárganselle ao arquitecto Melchor de Velasco cara a 1664, quen deseña un interior dunha soa nave, capela maior rectangular e cabeceira recta cunha sancristía a cada lado. A sobriedade é a nota principal do seu interior arquitectónico, alterada pola traza do seu retablo actual, obra que Francisco de Lens contrata en 1756 e no que traballará José Gambino, realizando as imaxes de san José, san Francisco e a do Apóstolo Santiago. No lado da epístola, no muro do cruceiro encontramos o monumento fúnebre do cardeal Martín de Ferreira obra do escultor Francisco Asorey.

22-31 marzo: 9 h-13:30h e 17:30h-19 h

Sede da Irmandade do Stmo Cristo da Misericordia. Procesión dos Estudantes: Mércores Santo, 23h.

** Capela de Nosa Señora do Portal - Convento de Belvís
Foron os dominicanos de Bonaval os que suscitaron a súa fundación en 1306, como o primeiro convento feminino da súa orde en Galicia. O edificio sofre ampliacións durante o século XVII, como a capela da Virxe do Portal, dunha soa nave e cúpula sobre o camarín da Virxe. A capela levantouse grazas ás esmolas dos fieis, pola crenza nas propiedades curativas dunha fonte que alí se localiza.

22-31 marzo: 11 h-13:30h e 16 h-19 h

** San Paio de Antealtares
A construción da igrexa iniciouse en 1700 no terreo que ocupaba a anterior que foi derrubada. A obra encárgaselle ao arquitecto bieito fray Gabriel de Casas proseguíndoas Pedro García que a conclúe en 1707, seguindo as trazas de Casas. A planta é de cruz grega con dous brazos curtos no cruceiro; aos pés, o brazo é máis alongado para acoller o coro. Entre 1708 e 1714 procédese a executar os retablos da igrexa. Érguense primeiro os retablos colaterais e o maior en último lugar. Hai que destacar que tanto o retablo relicario -trazado por Andrade- como o púlpito -obra de Diego de Romay- pertencían ao mobiliario da antiga igrexa.

22-31 marzo: 11 h-13:30h e 16 h-19 h

** Igrexa da Universidade
A igrexa da Compañía (Xesuítas) ou da Universidade levántase a mediados do século XVII sobre o terreo que antes ocupaba a medieval de Santa María a Nova. Ten planta de cruz latina inscrita nun rectángulo, con tribuna sobre as capelas laterais, nave abovedada, cúpula gallonada e lanterna rematando o cruceiro. A importancia desta igrexa reside no seu interior, nos retablos que adornan o altar maior, o cruceiro e as naves laterais. O do altar maior foi contratado en 1727 con Miguel de Romay, Ignacio Romero e Diego de Sande e segue as trazas que deseñou Simón Rodríguez.

Festival de Músicas Contemplativas: 22 de marzo, 22h. Jiri Bárta violoncello / 25 de marzo, 21:30h. Grupo instrumental Século XX / 29 de marzo, 22h. Il Concordu d'Orosei / 30 de marzo, 22h. Neopercusión

Coincidindo coa Semana Santa, o festival ofrece concertos gratuítos nas igrexas monumentais da cidade. Cantigas medievaise obras mestras do Barroco e do Renacemento conviven coa tradición espiritual de distintas culturas, relixións e continentes, da man de recoñecidas formacións ou artistas que moitas veces actúan por primeira vez en España.

Organizador: Consorcio de Santiago