De outubro a maio, a Real Filharmonía de Galicia e outras orquestras españolas e internacionais ofrecen no Auditorio de Galicia pretode 30 concertos, con máis de 100 pezas musicais e medio cento de directores e solistas invitados.

Grandes obras sinfónicas, corais e operísticas; estreas de autores galegos e concertos como o de Nadal ou o de Reis súmanse aos concertos familiares, os didácticos, ao ciclo de piano, ao ciclo de cámara e aos ensaios abertos ao público.

Fundada en 1996, a orquestra da cidade é hoxe unha formación con 52 músicos, tres directores -Antoni Ros Marbà como director artístico e titular, Maximino Zumalave, director asociado, e Paul Daniel, principal director invitado-, unha excelente crítica nacional e internacional, unha produción de 9 traballos discográficos, un nutrido currículo de xiras e un intenso calendario paralelo á temporada, que inclúe o ciclo de cámara Música na Compañía e a Escola de Altos Estudos Musicais para a formación dos futuros músicos galegos.

O artista Alfonso Rivero de Aguilar expón as súas esculturas no espazo xardín do Hotel Virxe da Cerca de Santiago, sendo o primeiro escultor que inaugura este espazo dentro do proxecto expositivo froito do convenio de colaboración entre Pousadas de Compostela e a coordinadora de exposicións Cristina Carballedo. Con este convenio dinamízanse expositivamente os emblemáticos espazos desta empresa.

Alfonso Rivero de Aguilar expón a súa última colección de esculturas nas que o fío condutor é a figura humana e as siluetas de animais. Este artista centra a súa obra no estudo dos materiais como o ónix, o granito ou o mármore.

'Compostella dicitur. A cidade da catedral' é o nome da exposición que inaugura o uso público da Casa do Cabido, un dos mellores edificios barrocos de Santiago. A exposición, relacionada co oitavo centenario da consagración da Catedral de Santiago, está ideada coma unha viaxe ao ano 1211, ano da consagración da basílica xacobea.

A mostra está organizada polo Consorcio de Santiago, coa colaboración de Seguros Reale.

A exposición conta con dúas aplicacións interactivas que permiten recrear o aspecto da cidade en 1211. A primeira é un plano virtual a través da cal pódense coñecer os nomes das rúas, das fontes, das portas da muralla e das igrexas, así como as áreas nas que se asentaban os diferentes gremios. A outra é un paseo virtual que recrea os pasos que un peregrino tiña que dar nesa época dende a Porta do Camiño ata a súa entrada na catedral.

A mostra complétase cunha serie de paneis explicativos que permiten coñecer aspectos relacionados co aspecto urbano da Compostela medieval: as igrexas da cidade, a antiga muralla coas súas portas, os oficios e os gremios. Un apartado especial está dedicado ao abastecemento de auga, cuxo sistema aínda hoxe perdura nalgúns puntos da cidade.

Tamén conta cunha colección de reproducións de vistas e planos históricos de Santiago, así como a vista aérea de 2008, a través dos cales pódese comprobar como a fisonomía da cidade histórica permaneceu practicamente inmutable ao longo dos tempos.

A exposición respecta ao máximo a estrutura do edificio recén rehabilitado, que, deste xeito, convértese nun aspecto máis da visita. A planta baixa, abovedada, da Casa do Cabido, acolle un resume, en imaxes, do proceso de rehabilitación ao que se someteu o edificio durante os últimos meses.

Planos históricos
A visita vai permitir coñecer de primeira man moitos dos planos históricos da cidade, a través das súas reproducións. Son planos que se gardan nos arquivos municipais e da catedral e no Instituto de Estudos Galegos Padre Sarmiento. Destacan catro planos procedentes do Arquivo Xeral de Simancas, nos que se debuxa a antiga muralla e a vella arqueta de San Miguel, cisterna que recollía o principal canal de abastecemento de auga na cidade dende a época medieval ata ben entrado o século XVIII. Tamén se poden admirar dúas vistas de Santiago, de Pier Maria Baldi (1669) e Ramón Gil Rey (1837).

O Departamento de Educación do Concello de Santiago de Compostela pon en marcha o programa de visitas didácticas á exposición 'Compostella dicitur. A cidade da Catedral. Santiago en 1211', que se pode visitar nun dos edificios máis emblemáticos da Praza de Praterías, a Casa do Cabido, un edificio barroco que naceu como unha resposta para pechar o lado sur da praza de Praterías e que foi recentemente rehabilitado.

Pasados os traballos de rehabilitación do edificio, 'Compostella Dicitur' abriu ao público o luns 9 de xaneiro. Estes traballos desenvolvidos na Casa do Cabido enmárcanse no proxecto global de actuación cultural que o Consorcio da Cidade de Santiago está a realizar na praza das Praterías, xunto coa remodelación do edificio do antigo Banco de España, que se está a acondicionar como sede principal do Museo das Peregrinacións e de Santiago.

As visitas didácticas están orientadas a grupos de escolares, asociacións e colectivos interesados da cidade e xiran en torno á exposición mencionada, unha mostra cun marcado carácter multimedia, cunha produción audiovisual tridimensional e interactiva que procura trasladar ao visitante á Compostela do século XIII, cando finalizaban as obras da catedral románica.

Os interesados poderán apuntarse previamente nos teléfonos 981 55 44 00 e 981 55 44 01 (Departamento de Educación. Concello de Santiago de Compostela); ou a través do correo electrónico dptoeducacion@santiagodecompostela.org

Debido as múltiples solicitudes recibidas, ofrécense tamén estas visitas guiadas ao público en xeral. Con tal motivo, realízanse de dúas visitas os sábados pola mañá (unha ás 10.15 e outra ás 11.30 horas). Os interesados poden apuntarse previamente no teléfono 981 576 661 (exclusivo para os grupos dos sábados) ou presencialmente, na taquilla do propio edificio. Para a realización da visita os grupos resultantes deberán contar cun mínimo de 8 persoas e un máximo de 20 ata completar o grupo.

HORARIO E DATAS DE CELEBRACIÓN PARA VISITAS DIDÁCTICAS GUIADAS: CENTROS ESCOLARES, ASOCIACIÓNS E COLECTIVOS
De martes a sábado, de 10 a 14 e de 17 a 19 horas.
Tamaño máximo do grupo: 20 persoas.

HORARIO E DATAS DAS VISITAS GUIADAS A PÚBLICO EN XERAL (PREVIA SOLICITUDE)
Os sábados 21 e 28 de xaneiro e 4, 11, 18, 25 de febreiro: sesións ás 10.15 e ás 11.30 horas.

RESERVAS PARA VISITAS GUIADAS: CENTROS ESCOLARES, ASOCIACIÓNS E COLECTIVOS
Departamento de Educación. Concello de Santiago de Compostela.
dptoeducacion@santiagodecompostela.org
Tfnos: 981 55 44 00 -981 55 44 01. Fax: 981 57 15 11

RESERVAS PARA VISITAS GUIADAS OS SÁBADOS: PUBLICO EN XERAL
Tfno: 981 576 661 e 981 55 44 00

Máis información: www.santiagodecompostela.org e www.catedralsantiago800.com