Turismo de Santiago promocionará a cidade como destino de congresos e incentivos. Entre outras ferramentas, empregará a nova guía profesional do Santiago de Compostela Convention Bureau, o servizo de Turismo de Santiago encargado da promoción da cidade como destino para a celebración de congresos, encontros, xornadas...

A nova guía profesional presentouse na edición de Fitur deste mesmo ano. Trátase dun manual pensado por e para os profesionais do sector que toman as decisións acerca de onde se van celebrar os congresos. A guía, dun modo moi visual, presenta os múltiples atractivos e recursos cos que conta a cidade: final do Camiño de Santiago, Patrimonio da Humanidade, cultura, gastronomía, arquitectura contemporánea, unha ampla oferta hoteleira e de servizos especializados, e diversidade de espazos nos que realizar calquera tipo de eventos.

Na entrevista co Alcalde, Reyes Leis amosaralle o interese de Santiago en profundizar nos lazos que unen a ambas cidades e a colaboración futura en promoción turística. Marco Filispechi visitou Santiago no ano 2010, e na súa intervención lembrou os vínculos históricos que unen ambas cidades, destacando as viaxes que Santa Bona programou de Pisa a Compostela como peregrina e como pioneira do Camiño.

No congreso participa a coordinadora científica do Programa Catedral de Santiago, Concepción Cirujano Gutiérrez. O programa, financiado pola Fundación Barrié, supón a intervención de maior relevancia realizada na basílica e contempla proxectos de conservación preventiva e restauración do Pórtico da Gloria e o seu entorno e das pinturas.

Ademais, proxectaranse o vídeo promocional de Turismo de Santiago, 'Santiago é Grande', onde hai diferentes planos da Catedral gravados con wescam no seu interior, e un vídeo da Fundación Barrié que describe o proceso de rehabilitación da Catedral. Tamén se distribuirá o folleto da Catedral, que dende xaneiro se pode adquirir en sete idiomas na oficina de información turística..

Italia é un dos principais mercados estratéxicos para Santiago. É o terceiro país con maior número de peregrinos, tras España e Alemaña, é o único con dúas conexións aéreas directas, con Milán e Venecia. Neste ano a empresa municipal participou na BIT Milán, a maior feira turística do país; e organizou un presstrip de xornalistas venecianos en colaboración con Volotea e a Asociación Hostelería Compostela. Tamén participou en Parma na presentación do programa Certo, para a promoción conxunta do Camiño de Santiago, a Vía Francíxena e a Ruta de San Olaf.  E en Roma fíxose unha presentación no Instituto Cervantes e un “porta a porta” con touroperadores coa colaboración de Turespaña.

Ao longo do popular programa emitiranse varias cuñas dun minuto de duración nas que se presentará a Santiago coma Cidade Patrimonio da Humanidade e destino do Camiño de Santiago. Tamén se fará referencia a que é a capital de Galicia, un país con raíces celtas que comparte elementos culturais coa propia Irlanda. Destacarase así mesmo o Hostal dos Reis Católicos, construido a fines do século XV como hospital de peregrinos e considerado o hotel máis antigo do mundo.

O mercado turístico irlandés é interesante para a cidade por varias razóns, entre as que destacan dúas: porque existe unha conexión aérea directa que une Santiago e Dublín tres veces por semana entre maio e setembro, e porque Irlanda ten fondas raíces católicas e, polo tanto, xenuíno interese no Camiño de Santiago. Por exemplo, en Dublín atópase a Irish Society of the Friends of St.James, unha entidade fundada xa en 1992 para promocionar en Irlanda a peregrinación a Santiago.

A conexión con Dublín leva xa varios anos funcionando. Os datos de pasaxeiros nos últimos catro anos foron: 2011, 17.206 pasaxeiros; 2010, 17.421; 2009, 12.020; 2008, 16.820. O obxectivo de Turismo de Santiago é promocionar a cidade en Irlanda e potenciar esta conexión, para que aumenten tanto os números de turistas deste país como o número de pasaxeiros neste enlace.

Os catro medios representados na viaxe suman unha audiencia de máis de dous millóns de lectores, segundo os datos proporcionados pola OET de Milán. Os medios son: Il Resto del Carlino, Il Giornale de Vicenza, Il Gazzettino e Dolce Vita. Os tres primeiros son xornais xeneralistas de difusión diaria, mentres que o último é unha publicación especializada en viaxes e ocio.

O programa preparado para os xornalistas, que estarán na cidade dende o xoves ao domingo, inclúe visitas ás cubertas da Catedral, ao casco histórico, á exposición 'Compostella Dicitur', que recrea a cidade do século XIII, un tour gastronómico pola Praza de Abastos e unha visita á Cidade da Cultura.

Presstrip desde Filipinas

Esta acción súmase a unha viaxe de xornalistas e turoperadores filipinos que Turismo de Santiago organizou a comezos desta semana, coa colaboración tamén da Asociación Hostelería Compostela e, neste caso, a OET de Singapur. Os xornalistas puideron coñecer da man dos técnicos de Turismo de Santiago os principais atractivos da cidade.

Ademais haberá dúas novas conexións con voos chárter en periodo estival: Funchal, na illa de Madeira, coa compañía Sata; e Liubliana, en Eslovenia, con Adria Airways. A estas conexións súmanse os enlaces coas principais cidades de Alemaña e Centroeuropa a través do hub de Palma de Mallorca con Air Berlin.

Con estas conexións, ningunha das cales recibe subvención por parte do Concello de Santiago, Santiago de Compostela e Galicia estarán conectadas cos seus principais mercados internacionais emisores de turistas: Alemaña, Reino Unido, Italia e Francia. Portugal, que é tamén un dos principais orixes de visitantes de Santiago e Galicia, terá unha conexión coa illa de Madeira. Ademais haberá enlaces con outros emisores interesantes para a cidade (Irlanda, Suíza e Eslovenia).

Turismo de Santiago está centrando as súas actividades de promoción nestes catro grandes mercados emisores cos que hai conexións directas. Así, por exemplo, está organizando para comezos de maio unha viaxe de xornalistas venecianos para promocionar a cidade neste mercado concreto, co dobre obxectivo de aumentar o número de turistas italianos e colaborar na consolidación da nova conexión aérea.

Na organización desta viaxe de xornalistas venecianos, Turismo de Santiago conta coa colaboración da Asociación Hostelería Compostela, que ofrece a hospedaxe e manutención, así coma da propia compañía aérea Volotea e da Oficina Española de Turismo en Milán.

Actualmente hai 36 Itinerarios Culturais Europeos recoñecidos polo Consello de Europa. O primeiro deles foi o Camiño de Santiago, que obtivo o recoñecemento en 1987. Outros dous dos máis importantes son a Vía Francíxena e a Ruta de San Olaf.

A Vía Francíxena partía de Canterbury, en Inglaterra, e cruzaba Francia, Suíza e Italia ata Roma. Foi a ruta de peregrinaxe a Roma máis importante da Idade Media. A Ruta de San Olaf foi a ruta de peregrinaxe máis importante do norte de Europa. Tiña como destino a catedral de Nidaros, na cidade noreguesa de Trondheim, onde reposan os restos de San Olaf, rei que introduciu o cristianismo en Noruega a comezos do segundo milenio.

A través do proxecto Certo, cinco entidades de catro países promocionarán conxuntamente os tres Itinerarios Culturais Europeos, que comparten o feito de ser rutas de peregrinaxe con gran influencia na Idade Media. As entidades que participan son o Concello de Santiago, Camiños de Europa (Parma), Asociación Europea da Vía Francíxena (Fidenza), Centro Nacional de Peregrinaxe da Ruta de San Olaf (Trondheim), e o Instituto Europeo de Itinerarios Culturais (Luxemburgo).

O proxecto Certo ten unha duración de 16 meses e un orzamento de 166.000 euros. Nas actividades de promoción previstas inclúense presstrips ou viaxes de xornalistas para que coñezan os distintos camiños, presenza conxunta en feiras e distintos foros de turismo para profesionais, presentacións en destino, programas para compartir experiencias e coñecementos, intercambios de espazos nas respectivas páxinas web dos participantes do proxecto e outros. A primeira acción terá lugar o próximo 27 de abril en Parma, nunha xuntanza das cinco entidades participantes na que tamén se presentarán aos medios os tres Itinerarios Culturais Europeos.

A concelleira de Turismo de Santiago de Compostela, Reyes Leis, recibiu o premio en representación do Concello durante a gala celebrada no Teatro Principal de Pontevedra. Os premios son outorgados anualmente polo Grupo Hostelería Galega e Turismo e a Asociación Galega de Xornalistas e Escritores de Turismo.

A web inclúe todo o calendario de procesións que se celebran na cidade, 16 en total, e das confrarías que as organizan. A primeira será a Procesión da Virxe das Dores, o 30 de marzo. Entre o 1 e o 8 de abril teñen lugar as restantes, salvo a Procesión do Cristo da Paciencia, que será o 15 de abril. 

En www.santiagoturismo.com tamén poden consultarse e reservarse as visitas guiadas e actividades turísticas: visitas guiadas á cidade histórica, dispoñibles en español, inglés e italiano; visitas guiadas ao patrimonio da Universidade de Santiago e visitas guiadas ás cubertas da catedral.

Completan o abano de posibilidades de lecer o tren turístico e as audioguías “Santiago en mp3”, que neste 2012 se amplían a 6: ademais da cidade histórica, a partir desta Semana Santa os visitantes contarán tamén con audioguías do Museo de Terra Santa, o Museo de Arte Sacra, a Colexiata de Sar, o Museo do Pobo Galego e o Hostal dos Reis Católicos. Durante estes días sairán ademais excursións organizadas dun día a Fisterra-Costa da Morte e ás Rías Baixas.

A presenza da empresa municipal de turismo na capital alemá responde non só á relevancia do evento para os contactos profesionais, senón tamén ao feito de que Alemaña segue a ser un dos mercados emisores máis importantes para España e o primeiro para Santiago de Compostela. A oficina de turismo compostelá recibiu o ano pasado 17.617 consultas de visitantes alemáns, que representan o 19% do total de consultas de estranxeiros.

O mostrador de Turismo de Santiago estará atendido durante os cinco días do evento. Os tres primeiros o acceso é exclusivo para profesionais: axentes de viaxe, turoperadores, prensa e prescriptores, cos que se manterá un intenso calendario de 20 citas e reunións prefixadas. A lista de contactos inclúe ás grandes axencias que xa operan no destino e a novos operadores potenciais, ademais das 10 visitas porta a porta ás grandes axencias de Berlín. Tamén se producirán encontros coas oficinas españolas de turismo en Alemaña e o Instituto Cervantes.

Apoio ás empresas turísticas compostelás
Os últimos dous a feira está aberta ao público final, o que intensifica a actividade do mostrador compostelán polo habitual interese dos viaxeiros de obter información e material sobre Santiago de Compostela e o Camiño de Santiago. O stand ofrece folletos sobre produtos turísticos (visitas guiadas, visitas MP3, excursións desde Santiago), folletos de establecementos (hoteis e restaurantes), guía completa de provedores de Santiago de Compostela e a exhibición permanente do vídeo ‘Santiago ist Grossartig’ (‘Santiago é Grande’).

Ademais, o mostrador compostelán cumprirá un ano máis o seu papel de apoio ás empresas santiaguesas asistentes á feira, que poden usar o seu espazo de reunións, e a aquelas que sen estar presentes envían desde Santiago os seus materiais. Á súa volta, os técnicos municipais canalizan todas as solicitudes concretas de información cara aos provedores de servizos.

Na pasada edición da ITB déronse cita 11.163 expositores de 188 países e territorios nunha superficie total de 160.000 m2, e foron contabilizados 110.791 visitantes profesionais, dos cales o 41,6% procedía do estranxeiro.

O libro será presentado polo coñecido xornalista Jan Erola o día 29 de febreiro nas instalacións da OET en Helsinki, ante turoperadores, prensa especializada e personalidades da cultura finlandesa. Como parte do acto, a empresa municipal de turismo compostelá fará unha presentación sobre a cidade e repartirá material promocional –dossier de prensa, guía profesional, vídeo promocional e fotografías- sobre a capital galega e o Camiño de Santiago.

O acto de presentación do libro conta tamén co apoio da Cámara de Comercio de Santiago, que terá un espazo para realizar unha presentación sobre os camiños xacobeos. Desde Santiago desprazarase o presidente da Cámara compostelá, Jesús Asorey, para manter contactos profesionais cos medios de comunicación e turoperadores. 

Un Camiño fácil para maiores
O proxecto do libro naceu tras unha viaxe de prensa organizada hai cinco anos por Turismo de Santiago en colaboración con Finnair, aproveitando un voo directo de Helsinki á capital galega. A este presstrip asistiron sete xornalistas, dos cales dúas atoparon un especial atractivo no Camiño de Santiago e a súa meta. Foi así como, ao longo deste tempo, Pirkko Vekkeli e Liisa Jappinen percorreron a ruta por etapas dende Francia e escribiron numerosos artigos  para dúas revistas femininas de alta tirada, ‘Eeva’ e ‘Kotiliesi’.

Resultado final da súa peregrinación é esta guía sobre o Camiño de Santiago dirixida a persoas maiores, cun sentido moi práctico, como a proposta de etapas doadas de alcanzar e a inclusión de información para persoas sen coñecemento de idiomas. 

A dieta atlántica caracterízase por unha grande variedade de alimentos frescos, de tempada e minimamente procesados, con abundancia de verduras, peixes, moluscos, crustáceos e algas, consumo moderado de carne de vacún, porco e lácteos, abundancia de auga de mananciais, uso de aceite de oliva e de salsas de baixa carga enerxética e alta calidade nutricional.

Na charla sobre "Ópera e Gastronomía", organizada polos Amigos da Ópera de Santiago, mostraranse fragmentos recoñecidos de óperas clásicas, nos que se establece unha conexión inequívoca entre a música, os seus autores e a gastronomía.

"Cinecea" e cociña con café

A Asociación Hostelería Compostela ofrece mañá, ás 17.00 horas, un obradoiro de Cociña con café. Será presentado por Óscar de Toro, campión galego de baristas, e impartido polos cociñeiros Rafael García e Marcos Crespo. No obradoiro elaborarase un menú a base de aperitivos, peixes, carnes e sobremesas con café como un dos principais ingredientes, acompañados dunha selección de viños.

O venres tamén se celebra a "Cinecea", unha actividade na que a gastronomía salta da pantalla á mesa cos protagonistas de “18 comidas”. Despois dun pase privado da película, degustarase un menú elaborado por Pedro Roca, inspirado directamente no film, que transcurre en Santiago. Na sobremesa falarase de cine e gastronomía, coa presenza do director da película, Jorge Coira.

Mañá péchase o prazo para facer as reservas das catas con maridaxe e dos obradoiros gastronómicos para nenos que terán lugar o sábado no Hostal dos Reis Católicos. As reservas poden facerse na oficina de información turística da rúa do Vilar ou no punto de información que Turismo de Santiago ten no Mercado de Abastos con motivo do Fórum Cidade. As entradas poderán mercarse tamén o mesmo día no Hostal, se quedasen prazas.

Os establecementos participantes e as tapas que presentan son: Abastos 2.0, Un cacho de escacho; Acio, A nosa berza á galega; Calderón, Pescada á galega; Casal do Cabildo, Bolo do pote e lacón sobre crema de grelos e espuma de chourizo; Garum Bistró, Orella crocante; La Bodeguilla de San Lázaro, Terrina de polbo co seu cachelo; Mesón de Lázaro, Bertón con berberechos; O Catro, Disfrace de Entroido; O Curro da Parra, Ravioli de carne ó caldeiro; Puerta del Camino, Lombo de xurelo ao punto sobre escalibada ecolóxica e crema suave de allo; Tafona Casa de Xantar, Verdinas con tripa de bacallau e crestas de galo; e Tapería Castelao, Caldo galego.

No folleto do Fórum Cidade inclúese un cartón cos establecementos participantes. Haberá diferentes premios para as persoas que cubran a ruta. O folleto pode recollerse na oficina de información turística muniipal ou no punto de información que Turismo de Santiago terá a partires do xoves 23 no Mercado de Abastos.

Fórum Noite

Mañá tamén comeza o Fórum Noite, co cal varios establecementos da cidade se convertirán en puntos de reunión e ofrecerán unha Copa Fórum, creada para a ocasión, a un prezo especial de 4 euros para aquelas persoas que presenten o folleto do Fórum Cidade, a acreditación do Fórum ou a Entrada do Fórum.

Os establecementos que participan son: Atlántico, Bolengo, El Malandro, Garoa, Vaová Gastro, Vaová Gin Bar. O horario é das 22.00 ás 01.30. Ademais organizaranse exhibicións de Gin-tonics de Schweppes & Premium Gins no Malandro o xoves ás 23.00, en Amoa o venres ás 23.00, no Bolengo o sábado 25 ás 22.30, e no Garoa o martes ás 23.30.

Ademais, por mor do Fórum, tres restaurantes da cidade farán menús degustación especiais. Serán o restaurante Calderón, o Garum Bistró e o Abastos 2.0.

Toda a información do Fórum Cidade está dispoñible no folleto do programa, que se pode coller tanto na oficina de información turística como no punto de información do Mercado, onde tamén se poden facer xa as reservas para as catas con maridaxe e os obradoiros gastronómicos para nenos que terán lugar o sábado no Hostal dos Reis Católicos.

Neste punto de información se poderán facer as reservas para participar en diversas actividades do programa, como as  catas con maridaxe ou os obradoiros gastronómicos para nenos, que se celebrarán o sábado 25 no Hostal dos Reis Católicos. Tamén se poderá adquirir a publicación infantil 'Santiago mmm... que rico!', coa que os nenos poden descubrir a cidade cumprindo unha serie de probas centradas na gastronomía. A publicación inclúe debuxos para colorear, fotos e planos. O xogo remata no Mercado de Abastos, onde os pequenos poden ver e comprender a importancia do Mercado para a cidade.

Cocido histórico e 'Carne sobre carne'

O Mercado acollerá na mañá do día 25 un momento inédito na historia contemporánea da gastronomía galega, cando o Grupo Nove, o Grupo Gourmand e Xantares preparen conxuntamente un cocido entre as nove da mañá e a unha da tarde. Será a primeira vez que os tres grupos de cociñeiros participan conxuntamente nun acto deste tipo, que sintetiza a unión e a forza das diferentes correntes gastronómicas de Galicia. Rematado o cocido, os asistentes poderán degustar o caldo. O cocido prepararase con produtos da máxima calidade, cedidos polo Mercado de Abastos, que é ademais proveedor oficial do produto fresco que se empregará nas actividades do Fórum Gastronómico.

O día 25, ás 12 da mañá, o Mercado acollerá a inauguración da exposición 'Carne sobre carne' do fotógrafo compostelán Juan Guerrero. Nesta serie fotográfica realizada na primavera do 2011, Guerrero reflexiona sobre xestos e escenas cotiás dos traballadores do matadoiro que cargan a carne dende os camións de repartición ata as carnicerías. Lonxe da fotografía documental, a exposición móstrase como unha metáfora: imaxes cunha rechamante aparencia visceral suxestionan ao espectador ata chegar a ver corpos e figuras realizando tarefas mecanizadas duras e tediosas, tarefas máis propias de seres menos humanos.

O Fórum Cidade está concebido para todos os públicos e distribúese por todos os recunchos da cidade. No programa inclúense actividades deseñadas directamente polo Concello, a través de Turismo de Santiago, e outras actividades propostas por diferentes restaurantes e entidades que quixeron sumarse á iniciativa, facendo así un programa aínda máis amplo.

O Fórum Cidade comeza o 23 de febreiro co Fórum Tapas, no que doce gañadores de Santiago(é)tapas elaborarán unha Tapa Fórum, a un prezo de dous euros. As primeiras persoas que completen a ruta recibirán unha cea nalgún dos restaurantes participantes. Para participar hai que cubrir o cupón incluído no folleto do Fórum Cidade.

Tamén entre o 23 e o 28 de febreiro celebrarase o Fórum Noite, no que varios establecementos da cidade ofrecerán a Copa Fórum, unha copa especial que se poderá consumir a un prezo de catro euros presentando o folleto do Fórum Cidade.

Dieta atlántica, ópera e cine

Na tarde do 24 o Centro de Formación e Cultura da Asociación Hostelería Compostela acolle o obradoiro "Cociña con café", presentado polo campión galego de baristas, Óscar de Toro, e impartido polos cociñeiros Rafael García e Marcos Crespo. Tamén na tarde do 24 o Hostal dos Reis Católicos será escenario de dúas actividades consecutivas: unha charla sobre “Dieta Atlántica: Nutrición, Gastronomía, Saúde e Calidade de Vida”, na que participarán os profesores da USC representantes da Fundación Dieta Atlántica, organizadora da charla, Rafael Tojo e Rosaura Leis; e unha mostra de “Ópera e Gastronomía”, organizada polos Amigos da Ópera de Compostela, na que se establecerá unha conexión entre fragmentos de diferentes óperas clásicas, os seus autores e a gastronomía, e que incluirá unha degustación de viños da DO Valdeorras.

Na noite do 24 terá lugar a “Cinecea”, onde os participantes terán un pase privado da película “18 comidas”, que transcorre en Santiago, para a continuación degustar unha cea inspirada na película e elaborada por Pedro Roca. Neste evento estará o director do filme, Jorge Coira, con quen os asistentes poderán compartir as súas impresións.

Obradoiros para todo

O sábado 25 será un día completo, no que dende a mañá ata a noite Santiago celebrará a súa gastronomía. A mañá comeza cun "Merco e Cociño", formato xa clásico de Turismo de Santiago, no que os asistentes acuden á Praza de Abastos cun cociñeiro para facer a compra e despois ir á cociña do restaurante a preparar diferentes produtos. Nesta ocasión será con Iago Pazos e Marcos Cerqueiro, do Abastos 2.0. 

Durante todo o día o Hostal acollerá tres catas con maridaxe, unha de cervexa Estrella Galicia con Conservas Cuca, outra de rones Bardinet con chocolates Barry Callebaut e a última de Embutidos Lalinense con Viños da DO Somontano de Bodegas Enate Saavedra Boado. Ao tempo, celebraranse dous obradoiros gastronómicos para nenos tamén no Hostal. A noite rematará con “Gustorama”, unha experiencia cinematográfica e gastronómica na que os asistentes terán que exercitar imaxinación, padal, visión e audición. Será no novo Espazo Gastrocultural do Abastos 2.0.

Cocido e Gastronovena

Un dos momentos cumio do Fórum Cidade será na mañá do día 25 na Praza de Abastos. Os cociñeiros dos tres grupos representativos da gastronomía galega, o Grupo Nove, o Grupo Gourmand e Xantares, prepararán conxuntamente un cocido entre as nove da mañá e a unha da tarde con produtos de primeira calidade cedidos pola Praza de Abastos. Será a primeira vez que os tres grupos se reúnen nun acto deste tipo, que sintetiza a unión das diferentes correntes gastronómicas de Galicia. Rematado o cocido, os asistentes poderán degustar o caldo.

Para o domingo 26 resérvase outra das actividades máis potentes do Fórum Cidade: a "Gastronovena". Dezasete cociñeiros do Grupo Nove, entre os que se atopan algúns dos posudiores da Estrela Michelín de Galicia, como Pepe Solla, Xosé Cannas ou Beatriz Sotelo, presentarán as súas elaboracións en oito establecementos da cidade. Os cociñeiros prepararán tapas de alta cociña, que se servirán a un prezo de dous euros. Finalmente, o luns 26 terá lugar o Fórum Viños, no que tamén oito establecementos ofrecerán a posibilidade de probar unha selección de viños de autor das adegas participantes no Mercado do Viño que se celebra no Fórum Gastronómico.

Toda a información do Fórum Cidade recóllese no folleto do programa, que se pode obter na oficina de información turística e na axenda desta web.

Durante a Borsa Internazionale dei Turismo, que convoca a uns 60 mil visitantes profesionais ao edificio da Fiera de Milano, a capital galega presentará as novidades da oferta compostelá de turismo cultural, de peregrinacións, de congresos e idiomático, nun mercado que, coma o italiano, ocupa o terceiro lugar de orixe dos visitantes de Compostela e representa máis do 11% dos visitantes estranxeiros na oficina de turismo municipal.

Nesta edición, Turismo de Santiago asistirá o día 17 ao seminario “I Cammini: una nuova prospettiva per il turismo europeo”, organizado por Cammini d’Europa en colaboración co Touring Club, no que a empresa municipal compostelá participará como único relator non italiano nunha mesa redonda de autoridades e expertos turísticos. A cita servirá así mesmo para estreitar lazos cos responsables das peregrinacións do Vaticano, a Opera Romana Pellegrinaggi.

A oficina española de turismo en Milán ofrecerá ademais un seminario con importantes datos sobre turismo italiano que servirán a Turismo de Santiago para a definición das estratexias de comercialización neste importante mercado. A isto engádense máis de 30 visitas ‘porta a porta’ a turoperadores que xa emiten grupos a Santiago ou que desexan comezar a traballar neste destino.

Trala edición de 2011, que tivo 20.000 visitantes, o evento deste ano aumenta o número de expositores, que proceden de sete países distintos e ofrecerán tanto automóbiles e motocicletas de época, como unha ampla gama de recambios e piezas. Además, aumenta nun 30% o espazo expositivo, ata os 18.000 metros cuadrados de exposición interior e exterior .

Un dos grandes atractivos desta edición é unha retrospectiva Porsche, na que se poderán ver máis de 30 deportivos que repasan a historia desta emblemática marca de Stuttgart, dende os primeiros 356 nas súas diferentes versións a modernos modelos como o 997 GT3, pasando por deportivos que marcaron época, como por exemplo o 911 RSR do 74, o 935 Le Mans, o 959 ou o Carrera GT.

Na mostra de Retro Galicia tamén poderán atoparse numerosos vehículos de carreiras, algúns dos cales son “xoias”, como o Renault 5 Turbo co que Jesús Puras competiu por toda España a mediados dos 80, o Ford Fiesta ex oficial que empregou Salvador Serviá ou mesmo, sen retroceder tanto no tempo, o Delta Integrale do mundialista equipo Lancia, pilotado no seu momento por Yves Loubet.

Retro Galicia tamén quere prestar servizos especiais aos propitarios de vehículos clásicos. Así, o sábado 18 haberá unha ITV móbil para aqueles que queiran aproveitar a visita para pasar tamén a Inspección Técnica sen necesidade da cita previa habitual e a un prezo especial.

Os horarios do evento serán: o venres 17 de febreiro, de 16 a 21 horas; o sábado 18 de febreiro, de 10 a 22 horas; e o domingo 19 de febreiro, de 10 a 20 horas. A entrada é de 8 euros.

A sesión de traballo foi inagurada no Radisson Blu Royal Hotel de Bruxelas polas conferencias do embaixador ruso ante a Unión Europea, Anwar Azimov, e do director xeral de Asuntos Internos da Comisión Europea, Stefano Manservisi, que se referiron ás oportunidades e retos do turismo entre Europa e Rusia.

Para Turismo de Santiago, a asistencia ao evento representa “unha oportunidade privilexiada para coñecer de primeira man os cambios que se aproximan nas relacións políticas e comerciais entre Rusia e a UE, toda vez que recentemente, nunha xuntanza entre ambas rexións, se tratou a posibilidade de suprimir o requisito bilateral do visado de entrada, moción pola que o primeiro ministro ruso Dmitry Medveded expresou un gran interese”, sinalou a concelleira de Turismo compostelá, Reyes Leis.

A empresa municipal de turismo participou en paneis de traballo nos que se espuxeron as opinións de expertos rusos sobre a súa propia industria e a súa capacidade crecente como mercado emisor, así como os resultados de estudos de investigadores e a posición de líderes de negocios da industria turística europea sobre a supresión dos obstáculos de negocio entre Rusia e Europa.

Tras a sinatura, un grupo de Xenerais da Ulla fixo na Praza do Obradoiro unha representación dun típico “alto” ou “atranque”, elemento central desta festividade, convidando a participar nos múltiples eventos que terán lugar durante o mes de febreiro nun total de 27 lugares e parroquias dos oito concellos.

O Entroido da Ulla remonta as súa orixes a primeira metade do século XIX e baséase nos enfrontamentos bélicos que se viviron entón na comarca: a invasión do exército napoleónico, a revolución do 1846 ou as guerras carlistas, que inspiran os atuendos e caracteres das principais figuras protagonistas.

Os personaxes máis importantes son os xenerais e correos a cabalo, que durante un mes percorren as parroquias ao longo do día dando vivas a veciños e visitantes, acompañados dun “exército” de abandeirados, coros, comparsas e parrandas.  Rematan escenificando un atranque ou alto, enfrontamento dialéctico por parellas, aproveitado para facer burla e sátira de asuntos locais, de política ou do corazón acontecidos durante o ano.

O protocolo de colaboración asinado en Santiago ten coma obxectivo xenérico promocionar conxuntamente as diferentes celebracións do “Entroido da Ulla” que teñen lugar nos oito concellos. Un dos obxectivos concretos que se marcan é a consecución da Declaración de Festa de Interese Turístico, tanto de Galicia como de España.

Neste ano, coa colaboración das Deputacións de A Coruña e Pontevedra, desenvolverase por primeira vez unha páxina web, xeneraisdaulla.com, na que se poderá consultar a información máis interesante sobre a festividade, así como os eventos que terán lugar nos diferentes lugares e parroquias. Editaranse tamén un cartel e un folleto promocionais.

A través da campaña "Compostela, destino cinco estrelas" os hoteis asociados a Hostelería Compostela ofrecerán aos seus clientes un almorzo gratuito, un paraugas e unha visita guiada á cidade cun guía oficial da Asociación de Guías Turísticos de Galicia. A campaña ten como un dos seus obxectivos fomentar a desestacionalización do turismo en Santiago, polo que terá lugar nos meses de xaneiro, febreiro, marzo e novembro de 2012, de tal xeito que se complemente o atractivo de Santiago.

"Compostela, destino cinco estrelas" será tamén un dos eixos da promoción da cidade en Fitur entre o 18 e o 21 de xaneiro, onde se distribuirán 6.000 postais da campaña. Todas as persoas que presenten estas postais nos hoteis da Asociación poderán beneficiarse das vantaxes da campaña. O outro xeito de poder acceder aos beneficios de "Compostela, destino cinco estrelas" é facendo as reservas das habitacións a través da central de reservas da asociación, na páxina www.santiagohosteleria.com.

Hostelería Compostela segue con esta iniciativa promocionando a cidade baixo o paraugas de "Compostela, destino cinco estrelas", continuando cunha liña de traballo que comenzou hai xa cinco anos. Entre outras accións, organizáronse presentacións profesionais da oferta turística da cidade en Valladolid, Salamanca e Oviedo, onde tamén houbo demostracións da calidade da oferta gastronómica da cidade e se proxectou o vídeo promocional de Turismo de Santiago "Santiago é grande" (http://www.santiagoturismo.com/santiagoturismo-tv/santiago-e-grande).

Esta nova aplicación, desenvolvida pola empresa Sinaptika, constitúe un importante paso adiante respecto da aplicación anterior, que se presentou en abril deste ano. Entre abril e decembro a aplicación tivo máis de 2.500 descargas, procedentes dunha ampla variedade de países, grazas a que está dispoñible nos sete idiomas nos que tamén está a web oficial de Turismo de Santiago: galego, castelán, inglés, francés, alemán, italiano e portugués. É unha cifra considerable, tendo en conta que ata agora só estivo limitado a dispositivos de Apple.

A nova aplicación, aínda que conserva a mesma base tanto en deseño como en contidos, ten agora versións tanto para os dispositivos de Apple como para os que empregan Android, de tal xeito que se multiplica o número de usuarios e se reforza a presenza da cidade neste novo espazo tecnolóxico para a información e a promoción turística. 
 
Novas audioguías e acceso ás reservas

A aplicación incorpora ademais 23 audioguías dispoñibles en seis idiomas, que se descargan individualmente e conteñen información turística de múltiples puntos e recursos turísticos de Santiago de Compostela. Desta maneira os visitantes poden deseñar con elas as súas propias rutas. A aplicación é gratuíta, pero cada audioguía ten un custo de 0,79 céntimos de euro.

Ademais, como terceira novidade importante, na aplicación hai enlaces directos á Central de Reservas de Turismo de Santiago. Isto permite aos turistas, estando aínda no seu punto de orixe ou xa chegados á cidade, consultar a dispoñibilidade de diferentes hoteis e reservar directamente as súas habitacións.

As páxinas onde se pode descargar a aplicación son:
Apple: http://itunes.apple.com/es/app/turismo-santiago-compostela/id477726045?mt=8
Android: https://market.android.com/details?id=com.santiagoturismo.app