Pazo de San Lorenzo

O Pazo de San Lorenzo de Trasouto é un singular edificio, próximo á zona monumental, construído en 1216. Está asentado sobre unha finca amurallada de 50.000 metros cadrados, que acolle un bosque e espléndidos xardíns. Ao seu extraordinario valor histórico úneselle o tradicional encanto dos pazos galegos. Todo o conxunto foi declarado ben de interese artístico e cultural.

O Pazo foi acondicionado para a celebración de xantares, convencións, congresos e presentacións comerciais en 1993. E máis recentemente, en 2002, emprendeuse unha gran transformación, que incorporou cociña propia de inspiración actual, de alta calidade e baseada no tradicional produto galego.

Dispón de dous antigos salóns nos que se poden organizar banquetes e reunións. O claustro, do século XVII, pechado e climatizado, contén unhas sebes de buxo con sorprendentes debuxos alegóricos da mesma época e é un lugar idóneo para servir comidas, aperitivos, cafés de traballo ou realizar presentacións comerciais. A igrexa, co seu magnífico retablo italiano do século XVI elaborado en mármore de Carrara, é un lugar excelente para realizar concertos de música clásica, antiga ou barroca.

Ofrece asesoramento profesional e facilita os medios técnicos precisos para calquera convención sofisticada. 

O Pazo ábrese só para actos concertados, xa que os propietarios manteñen o seu uso privado.