Hoxe é xoves 17 de maio, temos 17ºC e prevese algo nubrado
en Santiago de Compostela
Na Sala Santart inauguramos as noites de música cunha banda moi especial que apenas necesita presentación: Miki Nervio & The Bluesmakers. O noso concerto 'Santart Night Blues' conta cunha atmosfera moi especial: os músicos decidiron realizar o concerto (permitídenos a expresión - un tanto roqueira - ) "a pelo", ou sexa... con moi pouca amplificación... para integrarse no espírito familiar e cameral da nosa sala.
Un concerto desta natureza non se goza todos os días. A versatilidade deste gran grupo de blues fará que gocemos todos dun concerto que perdurará na memoria dos 30 privilexiados.
Miki Nervio & The Bluesmakers é unha banda lendaria dentro do panorama musical galego dende o ano 92, que se gañou a pulso o cariño, o respecto e a admiración do público.
Despois de 18 anos de andaina, o grupo ten ás súas costas centos de actuacións (entre elas o 1er Festival de Blues das Illas Açores ou o 8º Matosinhos em Jazz onde compartiron cartel con Toots Thielemans, Larry Coryell, John Abercrombie, Rufus Reid, Shemekia Copeland...), varias aparicións en directo en radio e televisión, a participación en diversas actividades audiovisuais, e catro CDs gravados, o último deles distribuído pola discográfica 'Pai Música'.
O estilo inicial do grupo enmarcouse dentro do Blues eléctrico, pero ao longo destes anos evolucionou cara ao son acústico da música negra de principios do século pasado.
Esta viaxe, buscando as orixes do Blues, permitiulles recuperar a tradición das "street bands" ou bandas na rúa, utilizando instrumentos pouco usuais e sorprendentes como a táboa de lavar, a guitarra de aceiro, as culleres, o banxo, o contrabaixo, a guitarra de doce cordas, a mandolina ou o kazoo.
O grupo actualmente dispón dun amplo repertorio composto por temas propios e versións, e a súa versatilidade permítelle actuar en calquera lugar, en plena rúa ou en todo tipo de local, teatro, grande escenario ou convención cun espectáculo diferente, alegre, ás veces divertido e ás veces potente. En calquera caso os anos de experiencia fan de cada actuación un momento inesquecible no que se repasa a historia do Blues.
As entradas reservadas póñense en venda no despacho da sala todos os venres entre as 20:00 h e 20:30 h.
PREZOS SOCIOS SANTART E ACOMPAÑANTES:
Compra anticipada antes do 15 de febreiro = 9,50 €
Compra posterior ao 15 de febreiro =14 €
PREZOS NON SOCIOS
Compra anticipada antes do 15 de febreiro = 11 €
Compra posterior ao 15 de febreiro =14 €
As entradas son validas exclusivamente para unha das dúas funcións.
En caso de que se realizara a compra anticipada, (ata o día 15 de febreiro) pero non se acudira ao concerto, a entrada carece de validez e non hai reembolso.
Como cada mes de maio, Santiago celebra as festas da Ascensión, unha das celebracións máis importantes da cidade na que a xuventude participa de forma notable. Os espectáculos que forman o seu programa están enfocados especialmente aos máis novos sen esquecer outros aspectos tradicionais como o Día do Neno, a Festa dos Maiores, diversas actividades deportivas, as orquestras da Alameda, o teatro de sala ou a animación de rúa.
Cadena 100 organiza esta noite un concerto na Praza da Quintana protagonizado polo veterano grupo Celtas Cortos, que presenta os temas do seu álbum máis recente, 'Vivos y directos', publicado en 2012.
As Festas da Ascensión continúan na súa terceira xornada coa celebración da fase local feminina de padel no Multiusos do Sar e unha nova proxección do Compostela Cine Classics'12, así como dúas funcións da comedia teatral 'Ni contigo ni sin ti' e o concerto Cadena 100, protagonizado por Celtas Cortos e Huecco na Praza da Quintana.
A programación musical das festas da Ascensión prosegue esta noite coas actuacións na Quintana de Nach e Erin, organizadas coa colaboración de XADE e incluídas nun programa de actividades de Cultura Urbana.
A cidade de Santiago prosegue coa celebración das súas festas da Ascensión cun nutrido programa de actividades para todas as idades. Ao longo de toda a xornada, no Pavillón Municipal de Santa Isabel, terá lugar o I Trofeo Cidade de Santiago de Baile. A cidade histórica será o escenario do concerto da banda Municipal e de pasarrúas que amenizarán o ambiente, así como de un espectáculo de monicreques para os pequenos da casa. E xa pola tarde, a fase feminina de padel e o concerto do artista valisoletano Eliseo Parra.
A música da orquestra Super Star encherá de ritmo a Alameda esta noite, nunha sesión de baile incluída no programa das festas da Ascensión 2012.
As festas da Ascensión 2012 chegan hoxe á súa fin cunha xornada enteiramente dedicada aos máis cativos. Deste xeito, todos os rapaces que se acheguen este domingo ás atraccións da Alameda gozarán dunha rebaixa do 50% no prezo das entradas.
